El Conseyu Consultivu entregó'l so dictame sobre la reforma del Estatutu d'Autonomía

El presidente del Conseyu Consultivu Bernardo Fernández, entregó-y ayeri al Gobiernu asturianu el dictame sobre la reforma del Estatutu d'Autonomía que solicitare formalmente'l presidente del executivu asturianu, Vicente Álvarez Areces.

Nel actu d'entrega del dictame Bernardo Fernández alvirtió qu'ún de los miembros del Conseyu Consultivu, el exdelegáu del gobiernu col PP Fernando Fernández Noval, emitió un votu particular esplicando que'l Conseyu Consultivu nun debiera retrucar la consulta del Gobiernu sobre la reforma estatutaria.

Nun hebo novedaes nel actu de presentación sobre'l conteníu del dictamen, en cuantes que "por respetu a los solicitantes" ye preciso esperar a que lu llean los miembros del Conseyu de Gobiernu, anque'l testu va colgase darréu d'ello n'internet. Areces aclarió nel actu que quier llevar alantre la reforma na llexislatura en cursu, anque reconoció qu'ello diba ser difícil.

El dictame del Conseyu Consultivu respuende a 28 entrugues plantegaes el 25 de xineru pol executivu asturianu. Ente les cuestiones que se facíen pedíase-y al Conseyu Consultivu qu'apautare los posibles escenarios de definición de la comunidá asturiana como rexón, nación o como cualquier otra posibilidá, y que se describieren los efectos xurídicos que tendría cada denominación. Otra de les consultes falaba de la definición de les llendes d'Asturies énte la posibilidá de qu'Estatutos de comunidaes qu'atiesten cola nuestra plantegaren la posibilidá de facer cambeos nel so territoriu.

El Gobiernu asturianu entrugaba tamién al Conseyu Consultivu sobre la posibilidá de desaniciar la condición, obligatoria anguaño, de que'l Presidente del Gobiernu asturianu sía tamién diputáu na Xunta Xeneral y les posibilidaes de facer cambeos na elección d'esti cargu na Xunta Xeneral. El decretu tamién entruga poles víes hacia la creación d'una policía autonómica, pidiendo que s'analicen l'ampliación de les funciones de les unidaes policiales anguaño venceyaes al Gobiernu asturianu y poles posibilidaes de disolver anticipadamente la Xunta Xeneral y convocar elecciones autonómiques anticipaes.

El testu d'entrugues trataba la cuestión de la llingua asturiana, anque ensin avanzar o dar a entender voluntá d'alteriar l'estatus actual del asturianu dientro del testu del estatutu. La entruga concreta pidía un "Análisis del alcance xurídicu de la regulación estatutaria del bable o asturianu y de los sos desarrollos normativos, lo mesmo que del grau de protección normativa que se-yos da a les modalidaes llingüístiques propies de la zona occidental asturiana" una redacción lo bastante abierta pa que nella puea entrar dende un analisis qu'incluya la redacción actual del estatutu y la so hipotética suficiencia o insuficiencia hasta una posible rellación del asturianu con otros estatutos na materia llinguística, anque en cualquier casu'l testu evitaba crear espectatives al eludir dafechu cualquier referencia a la posible modificación del artículu 4 del actual estatutu, que ye nel que se fala de la llingua asturiana, amás de nun facer referencia nenguna a un hipotéticu casu d'oficialidá del asturianu.

El Conseyu Consultivu ye un equivalente asturianu al Conseyu d'Estáu y fórmenlu cinco miembros, l'ex presidente asturianu Juan Luis Rodríguez-Vigil, l'ex - vicepresidente asturianu Bernardo Fernández, l'ex - delegáu del Gobiernu Fernando Fernández Noval, la ex - secretaria xeneral técnica de la Conseyería de Presidencia, Luisa Fernanda del Valle y el caderalgu de Derechu Constitucional Francisco Bastida.