El Conseyu Consultivu diz que parte de la sociedá podía ver como dalgo "artificial" la normalización del asturianu

El dictamen del del Conseyu Consultivu sobre la reforma del Estatutu d'Autonomía d'Asturies asegura que la normalización del asturianu vese como daqué "artificial" por "una parte non pequeña de la sociedá" y afirma que'l reconocimientu del "bable" como llingua específica o propia nun ha atechar lleis que desarrollen una "oficialidá tapecida".

Ensin llegar a marcase al favor o en contra del reconocimientu del asturianu como llingua oficial nel estatutu d'Autonomía, dalgo que tampoco de pidía na entruga plantegada pol executivu asturianu, el dictamen del Conseyu Consultivu sobre la reforma del Estatutu d'Autonomía d'Asturies nun pinta un panorama positivu pa que se llogren mayores cuotes de reconocimientu de la llingua d'Asturies nel estatutu. Según informaciones asoleyaes nel diariu "La Nueva España" que tuvo accesu al los conteníos del dictamen enantes de qu'esti se ficiere públicu, "el bable, como llingua asturiana o conxuntu de modalidaes llingüístiques podría declarase cooficial si asina lo dispusiese l'Estatutu" pero aclaria que anque "nel estatutu pueda calificase al bable y les sos modalidaes como "llingua específica" o "propia" d'Asturies, ello nun ha llevar arreyada cooficialidá nenguna nin ha sirvir d'abellugu xurídicu a lleis que de manera tapecida establezan elementos de cooficialidá".

El documentu, siempre según lu da a conocer el diariu uvieín, alvierte de "les dificultaes que lleva arreyáu un procesu de normalización lingüística" y recuerda que "la normalización social ha dir per delantre de la normalización xurídica" sorrayando que la normalización conviértese en daqué "verdaderamente complicao al esistir una parte non pequeña de la sociedá que-y abulta que la normalización, de facese, diba ser un puru artificiu".