El Congresu valta los presupuestos de Sánchez y pon les eleiciones anticipaes nel horizonte

|
María Jesús Montero PXE

La xunión de los votos de los nacionalistes catalanes a los de Foro, PP, UPN, Ciudadanos,  EH Bildu y Coalición Canaria valtaron nel Congresu los Presupuestos Xenerales del Estáu (PXE). Esta situación llevará al presidente del Gobiernu estatal Pedro Sánchez, como vien anunciando, a la convocatoria d’eleiciones anticipaes.

Nun hebo cambiu de posición y ERC-Catalunya Sí y PDeCAT (presentáu a les eleciones como CDC) votaron a favor de les enmiendes a la totalidá de los PXE xunto con cinco formaciones de dereches, EH Bildu y dos de los cinco diputaos d’En Marea, a pesar de los intentos d’última hora de Xuníos Podemos y EAJ-PNV de buscar entendimientu. Asina, con un resultáu de 191 votos a favor por 158 en contra, los del PSOE, Compromís, la coalición d’izquierda y conservadores vascos, el Congresu aprobó la devolución de les cuentes al Gobiernu.

Esta situación obliga a Sánchez a tomar decisiones, que pasarán pola convocatoria d’eleiciones anticipaes. El 14 d’abril y el 26 de mayu, nun ‘superdomingu eleutoral’ nel que yá tán convocaes les Europees, Nacionales y municipales, son les dos feches que más suenen pa celebrar les Estatales, anque nes últimes hores tamién se valora como posible’l 28 d’abril.

Na semeya, la ministra de Facienda, María Jesús Montero, esta mañana mientres la so réplica al grupu Xuníos Podemos-En Comú Podem-En Marea enantes de la votación.

Contador Estadistiques