El Congresu refugó la Llei de Llingües d'Esquerra Republicana

El Congresu de los Diputaos refugó la pasada selmana la proposición de llei que nel so día presentare Esquerra Republicana de Catalunya y que defendía la oficialidá del gallegu "nos territorios gallegofalantes de la faza occidental d'Asturies" acordies col articuláu propuestu por ERC y que nel momentu de presentase pel mes de setiembre del 2005 causó abonda rocea nel asturianismu.

Anque representantes d'ERC calificaron d'error la redacción de la llei y llegaron a afirmar que diben cambiar cambiar l'articuláu de la mesma no tocante a esti puntu, ello nun llegó a facese y la llei llegó na so forma orixinal a trámite. De cualquier manera, y anque l'articuláu de la llei que proponía ERC nun fai referencia al asturianu, el diputáu d'esta formación encargáu de defendela, Joan Tardá y Coma, sí reconoció nel so discursu énte la cámara que nel estáu esisten "llingües minoritaries, de les que bien d'elles sufren procesos de minorización, qu'obliguen a una actuación prioritaria" citando ente elles a la llingua asturiana xunta la llingua aragonesa y la llingua tamazigh .

El representante del BNG en congresu, Francisco Rodríguez Sánchez, desfízose n'allabancies a la propuesta d'ERC que calificó de "testu estructuráu con un valor oxetivu tan grande, que nun niega lo que la romanística tradicional, en concreto Menéndez Pidal, almitía en plenu franquismu, qu'efectivamente hai presencia de les llingües como'l gallegu, el catalán o'l vascu fuera de les sos fronteres alministratives" con especial atención "al casu del gallegu, que ta presente nuna faza de la Comunidá Autónoma de Castiella y Lleón y nuna tamién del Principáu d'Asturies".

La llei nun s'aprobó en Congresu al amestase los votos en contra d'ella de PP y PSOE, pero contó col sofitu de la mayor parte de los partíos nacionalistes con representación na cámara. A pesar de les crítiques que dende Izquierda Xunida d'Asturies se fixeron reiteradamente contra les inxerencies llingüístiques n'Asturies, el grupu d'Izquierda Xunida-Iniciativa per Catalunya tamién votó a favor de la propuesta d'Esquerra Republicana.