El Condal va cruzase col Cayón na segunda eliminatoria

El Club Deportivo Cayón, que dio la sorpresa al eliminar al Navalcarnero, ye'l siguiente rival del Condal nel so camín a Segunda B. La ida va xugase'l sábadu a les 18 hores en Cantabria.

Clasificáu en cuarta posición, el sortéu cruzó al equipu de Sarón con un conxuntu madrilanu, al igual qu'al Condal. El rival foi'l Navalcarnero, segundu nel grupu 7, al qu'eliminó pol valor doble de los goles tres empatar 0-0 nel Fernando Astobiza y 1-1 en Madrid. Nun corrió la mesma suerte'l Condal, que tres finar 2-2 nel Alejandro Ortea, viose superáu en Majadahonda por 3-0 pol Rayo, equipu yá de Segunda B.

Jaime Leiva ta pendiente pal partíu del sábadu de Jairo Cárcaba, ún de los xugadores más importante del Condal, que se retiró lesionáu'l domingu por un esguince del ligamentu llateral esternu de la rodiella. Pese a esta más que previsible baxa pal sábadu, los de Noreña van tener el refuerzu de la so afición en Sarón, yá que'l club entama un viaxe por 25 euros, entrada incluyida. Les persones interesaes pueden apuntase nos teléfonos 662.234.559 y 985.74.37.03.