El Conciertu pola Oficialidá enllenó'l Pueblu d'Asturies en Xixón

El Conciertu Pola Oficialidá 2004 de la Xunta Pola Defensa de la Llingua Asturiana foi un verdaderu éxitu, con bona música, munchu público y meyor ambiente. Esta ye la crónica de lo qu'ellí pudo ver y escuchar Asturies.com esti sábadu de nueche.

Na organización del Conciertu había munchu miéu a la lluvia, el mal tiempu de los díes anteriores podía echar p'atrás a muncha xente a dir al conciertu. Pero cuando pa eso de les 20:00 hores entamaba'l conciertu yá taba claro que l'agua diba respetar la nueche y que'l públicu nun diba faltar a la so cita cola música y la revindicación llingüística. A lo llargo de la nueche más de 2.500 persones pasaron pel Pueblu d'Asturies, lo que fizo qu'en too momentu hubiere folixa tanto dientro como fuera de la carpa instalada nel recintu, que s'abrió per un lateral p'aprovechar meyor el sitiu. La primer actuación vieno de la mano de la banda de gaites de Llangréu, que nel escenariu interpretó delles pieces del so repertoriu, una d'elles franciendo la tradición al dexase acompañar por una guitarra eléctrica, un baxu y una batería. Namás acabar la banda arrancó "Skanda", que tenía'l difícil llabor de ser los primeros n'intentar animar al primer públicu, que disfrutó colos sos temes de siempre y dellos del que va ser el so nuevu discu d'equí a poco.

Darréu actuó "La Bandina", que como camentábemos la selmana pasada, foron sacar a munchu públicu a baillar, sobre too coles dances que xuntaron a bien de xente en corros énte l'escenariu. Namás acabar "La Bandina" entró tocando na carpa la banda de Gaites "Xiranda" d'Uviéu, faciendo una entrada "espectacular"que recibió'l públicu con munchos aplusos y ximielgando banderes. Pel mesmu camín que "La Bandina" foron tamién los siguientes n'actuar, "Los Ciquitrinos" que s'enfrentaron a un auditoriu qu'enllenaba dfechu la carpa. El gaiteru del grupu, el célebre Rubén Arias, que nun dexó de facer toa triba d'observaciones iróniques a lo llargo de l'actuación, lleó un poema del escritor Andrés Solar enantes d'entamar el conciertu nun de los momentos más emocionantes de la nueche, yá que tanto la Xunta como los grupos que tocaron quixeron recordar a lo llargo de tol conciertu la figura del escritor, miembru fundador de la Xunta va venti años, y al que-y se dedicó anguaño la Selmana de les Lletres.

Col fondu sonoru d'un anunciu de radio de los años 60 d'Anís de l'Asturiana xubió al escenariu ún de los grupos más esperaos de la nueche, "Dixebra" colos qu'un públicu yá definitivamente entregáu blincó y saltó a lo llargo d'un repertoriu que meció cantares del so últimu discu con bien de temes de la so primer época, que yá son himnos del rock n'asturianu gracies a les lletres de Cesáreo García "El Maniegu" y que Dixebra ta recuperando nos sos últimos conciertos anque con igües un poco distintes a les que puen sentise nel históricu "Grie-ska" y nel segundu trabayu de la banda, "Asturies o trabayes". Foi pena que "Dixebra" tuviere que meter tixera a la so actuación porque la nueche taba allargándose más de lo que taba apautao coles autoridaes. Esti recorte sufriólu en mayor midida "Skontra" que, amás de tener la complicada papeleta de mantener l'ambiente dempués de "Dixebra" namás pudieron tocar media hora. Con too y con ello, el grupu pasó la preba con nota y dexó a munchu públicu con gana d'escuchar más de los xixoneses. Pa munchos quedó pendiente ver a "Skontra" nun conciertu enteru, dempués de lo que se sintió esti sábadu: punk y soníu duro, pero con un aquello d'influyencia folk y reggae que fai d'ellos un grupu asimilable incluso pa públicos que nun-yos dea más por esti estilu

La organización de la Xunta Pola defensa de la Llingua Asturiana tuvo nun bon nivel, anque hai que señalar que'l fallu en repartir meyor el tiempu disponible qu'obligó a "Skontra" y "Dixebra" a recortar les sos actuaciones. En resume, una nueche que foi ún de los meyores Conciertos pola Oficialidá de la historia, un eventu qu'axuntó a munchos asturianos y asturianes al rodiu de la revindicación llingüística. Too ello nun marcu como ye'l del Muséu del Pueblu d'Asturies que la organización nun descarta como escenariu de futuros acontecimientos.