El Conciertu Pola Oficialidá aconceyó a más de 3.500 persones n’Uviéu

La 19 edición del Conciertu Pola Oficialidá que tolos años organicen la Xunta Pola Defensa de la Llingua y la so estaya de mocedá, la Xunta Moza, resultó un éxitu dafechu pola so capacidá de convocatoria, que llevó a que más de 3.500 persones pasaren pela carpa asitiada xunta'l Campus d'Humanidaes de la Universidá d'Uviéu a lo llargo de les más de siete hores de conciertu reivindicativu, repartíu en dos escenarios pelos que pasaron en primer llugar el cantautor Toli Morilla, el grupu folk de Ribeseya Corquiéu, el tríu DRD, el hip hop K-Nalón y el conxuntu de L.lena la Col.la Propinde,pa da-yos pasu sobre les 11 de la nueche a los avilesinos Dixebra, que dieron una interesante anuncia.

Ello ye que la banda avilesina de rock-fusión, que va cumplir a primeros del 2007 los sos venti años d'esistencia, polo que quier celebrar esta trayectoria musical con un discu que va recoyer, per primer vegada, la so música en directo. El discu y DVD conmemorativos de la banda de Xune Elipe, que van ser el novenu trabayu de la so carrera musical y el primeru que recueya'l so potente directo, nun van asoleyase hasta les navidaes, pero la grabación va facese d'equí a la vuelta poco, concretamente'l 3 de xunu, cuando Dixebra va tocar nun conciertu especial na Plaza'l Parche d'Avilés, la ciudá au naciere'l grupu. Dixebra llevaba selmanes buscando un llugar y una fecha pa poder facer esta actuación preparada a costafecha pa grabala, pero l'anuncia nun llegó hasta'l conciertu pola Oficialidá del pasáu sábadu n'Uviéu.

El cantante y fundador de Dixebra comunicó la novedá al numberosu públicu qu'acudió a la so actuación dientro del festival qu'organiza la xunta Pola Defensa de la Llingua y que remató coles actuaciones del grupu el ska-rock de Skama la Rede y los soníos más arispios d'Oi n'Ast.