El Conceyu Internacional de Lliteratura Asturiana echa’l piesllu

El II Conceyu Internacional de lliteratura asturiana qu'entama l'Academia de la Llingua Asturiana celrebra esti xueves 8 la so última xornada, qu'entama a les 9:30 hores cola conferencia "La narrativa breve en llingua asturiana y catalana (1980-2000)", a cargu de Marta Fernández Morales, de la Universidá de les Isles Baleares. Xosé Lluis Campal Fernández, va falar a les 10:30 de "Lliteratura asturiana y prensa decimonónica. Xenealoxía d'una recepción" mientres que Jaume Subirana, de la Universitat Oberta de Catalunya, va dar a les 12:00 hores la conferencia "Berta Piñán y María-Mercé Marçal. Poesía amorosa y identidá". La mesma Berta Piñán va falar a les 13:00 hores sobre "Voces de muyeres na poesía asturiana contemporánea".

La sesión de tarde entama les 16:00 hores coles comunicaciones "Invisibilidá y traducción en llingua asturiana" (M.ª Cristina Valdés Rodríguez) "El llabor de tornar dende la óptica femenina" (Helena Trejo Fombella), "'La Xudí' (1770). Reaiciones crítiques" (Xosé Ramón Iglesias Cueva), "Barrocu asturianu. Bernaldo de Quirós y 'El caballu'" (Montserrat Machicado Compañy) "Modelos narrativos nuevos na lliteratura asturiana actual" (Marta Mori d'Arriba), "Identidá y memoria na narrativa de Xandru Fernández. Una güeyada dende la crítica postcolonial" (Laura Marcos Domínguez), "A augua, elemento vital e recurrente na poesía d'agora mesmo en galego-asturiano. Unha ollada poética" (Aurora García Rivas) y "Llíricos griegos arcaicos en llingua asturiana" (Ramiro González Delgado). Tres la llectura d'estes comunicaciones, Xosé Bolado va moderar dende les 18:15 h una mesa redonda sobre'l teatru asturianu de güei colos autores Chechu García, Roberto Corte y Ramón Lluís Bande.

N'acabando les sesiones del Conceyu va inaugurase na sala "Café Español" de la Cai Cimavilla d'Uviéu la esposición titulada "La lliteratura n'asturianu", que va tar abierta hasta'l 30 de payares.