El conceyu de Tapia reconoz esti sábadu la trayectoria de Manuel García-Galano

El Conceyu de Tapia, en collaboración cola Secretaría del Navia-Eo de l'Academia de la lLingua Asturiana y l'asociación Xeira, organicen esti sábadu un homenaxe a la figura de Manuel García-Galano, decanu de les lletres na fala eonaviega.

Nacíu en A Roda nel 1922, García - Galano ye ún de los axentes más activos de la vida cultural del occidente asturianu. Metíu dende mozu n'actividá cultural, participó como músicu na Banda de Música de Salave, y na Filarmónica de Tapia, onde marchó a vivir nos años 40. Actor en dellos grupos de teatru del llugar, nos años 50 entamó'l so llabor como escritor, presentando xunto con otros dos escritores tapiegos un conxuntu d'obres teatrales escrites en gallego-asturianu. A partir de mediaos de los 70, García - Galano convertióse nuna referencia pa los grupos de teatru de la zona, qu'entamaron a reclamar el so bon facer como autor d'unos testos, que, ensin abandonar los conceptos básicos del costumismu, non por ello cayíen nun humor afectáu, siendo, en cuenta d'ello, obres con bien de retranca que trataben amás en munchos casos cuestiones d'actualidá. Esti calter d'espeyu de los socesos del momentu vese sobremanera nos sos testos de la transición política en p'alantre, pelos qu'apaecen mecíos conceyales d'escures intenciones, promotores, xente aprovechao y turistes europeos.

De toa esta obra teatral fízose estoyu nel llibru "mareaxes tapiegos" de 1993 tres del que vieno, nel 2000 un segundu volume teatral col títulu de "Erguendo'l telón". Amás del teatru, Galano tien asoleyao obra narrativo como'l volume de narraciones "Parzamiques" de 1993 y un "Vocabulariu da Roda" contribución de gran valir al procesu de recuperación del gallego-asturianu.

Dende que nel añu 1996 echare a andar la revista en fala eonaviega "Entrambasauguas" qu'empobina l'Academia de la Llingua, Manuel García - Galano ye ún de los sos collaboradores fixos de la mesma, con artículos imprescindibles pa conocer a bien de personaxes y llugares populares del occidente astur. Estes collaboraciones pa la revista son precisamente les que se recueyen nel volume "Vento d'Outono", estoyu de los sos escritos nestos diez años.

Premiu de narraciones de l'asociación Xeira nel añu 91, Manuel va recibir esti sábadu l'homenaxe a toa una trayectoria vital nuna xornada que va entamar a les 12:30 nel salón d'actos del Institutu "Marqués de Casarego" de Tapia cola presentación del últimu llibru de Galano "Vento d'outono" actu nel que van participar l'alcalde de Tapia Gervasio Acevedo, la presidenta de l'ALLA Ana Cano, l'académicu de la llingua José Antonio Fernández Vior, y Josefina Cascudo, del grupu teatral "Ameicer". Yá de tarde, dende les 5, una carpa asitiada énte la ilesia parroquial de Tapia va acoyer el restu de los actos, cola participación musical de la Coral Polifónica de Tapia, la Rondalla Brisas Tapiegas y el grupu folk Ayalga. Les obres del autor homenaxeau tampoco nun van faltar, y asina, na parte teatral, el grupu ameicer va llevar al escenariu la obra "quieto parado", mientres que'l grupu "Pico de Faro" da Roda va llevar alantre la interpretación de la obra "Estruñóis da vida".