El Conceyu de Lliteratura de l’ALLA céntrase na emigración

L'Academia de la Llingua Asturiana sigue cola celebración del Conceyu Internacional de Lliteratura Asturiana, qu'entama les sos actividaes d'esti miércoles a les 9:30 hores cola ponencia de Jorge Domingo Cuadriello, del Institutu de Lliteratura y Llingüística de La Habana y que va falar de la lliteratura asturiana en Cuba. Tres d'elli, Andrés Villagrá, de la Universidá Pace de Nueva York, va falar a les 10:30 hores, sobre "La presencia de la lliteratura asturiana na emigración".

La sesión de mañana inclúi tamién les presencies d'Andrea Ordieres y Ignacio Mundo, del Centru Asturianu de Buenos Aires, con "Testos n'asturianu na revista Asturias de Buenos Aires" y d'Antonio Bárbolo Alves, del Centru d'Estudios Antonio María Mourinho, de Miranda del Douro, con "Baltasar Díaz na tierra de Miranda. Coloquios, intertestualidá y representaciones".



Dende les 16:00 hores "L'ambición lliteraria. Delles cuestiones sobro la percepción y encaxe" va ser el títulu de la conferencia que dea'l filólogu Xuan Santori, mientres que dende les 17:00 hores vien una riestra de comunicaciones protagonizaes por M.ª José Fernández Fernández ("De Pórticu a Tiempu de la espera: un viaxe interior", Pablo Rodríguez Medina ("Averamientu al mapa de Sodoma: el tratamientu de la homosexualidá na nueva narrativa asturiana"), Nicolás Bartolomé Pérez ("Poesía lleonesa en llingua asturiana", Severino Antuña González y Jorge E. Fernández Riera ("El canon de la lliteratura xuvenil n'asturianu") los docentes Mercedes Calzada Redondo, Xurde Fernández y Marián García cola colectiva "¿Qué ye pa ti la lliteratura? (o la difícil xera de tresmitir la lliteratura na educación)". Jeroni Salom va falar "Llectura de los diarios de Pablo Antón Marín Estrada" mientres que Próspero N. García y Chechu García van facer un "Averamientu a la historia del cómic n'asturianu" y el filólogu Roberto González-Quevedo va tratar de "Símbolos d'Asturies na lliteratura de la emigración". Pa echar el piesllu a la xornada ta previstu a les 19:30 hores un debate sobre la narrativa asturiana de güei colos autores Xulio Arbesú, Pablo Rodríguez Medina y Naciu Varillas y col académicu Miguel Ramos Corrada de moderador.