El Conceyu d'Ayer, una cita clásica del folk

Yá son ocho ediciones de la Nueche Celta del conceyu d'Ayer, conciertu que suel tar n'axenda de munchos asturianos y asturianes.

Esti conciertu tien ganada la confianza de los aficionaos al folk asturianu, munchos grupos de calidá y un llugar bien guapo como ye Soto D'Ayer son los sos argumentos. Pero esti eventu tien yá una llarga hestoria, al traviés de la cuála foi adulces creándose lo que ye güei la nueche folk d'Ayer. La nueche folk d'Ayer nació col oxetivu de sirvir pa promocionar la imaxe del conceyu, dende la primer edición los organizadores incorporaron a grupos de fuera d'Asturies pa intentar cumplir col oxetivu d'esparder la imaxe turística d'Ayer. Esto fizo garrar a esta nueche un elementu diferenciador col restu de conciertos folk d'Asturies, lo qu'ayudó a facer medrar el proyectu. Como exemplu tan los datos técnicos, de los 12.000 W d'allume y 10.000 W de soníu na primer edición, pasóse a 40.000 W de lluz y 30.000 W de soníu d'aguaño.

Esta edición el cartel cumple coles característiques propies d'esta nueche, seyes grupos d'Asturies y fuera d'Asturies nun dexen llugar a duda. Presentámosvos los grupos por orden d'actuación: "Tarañu", grupu mozu ayerán que lleva dalgunes actuaciones esti veranu, y que tien nesta nueche una perbona oportunidá pa presentáse al públicu asturianu. "Keltieg", formación que vien d'Eslovaquia que fai un amiestu cola música tradicional eslovaca y la música folk atlántica d'inspiración irlandesa, prueba d'ello ye que'l grupu usa gaita eslovaca pero tamién Uillean Pipe. Especialmente interesante va ser l'actuación de "Flook", una auténtica amuesa de técnica gracies a dos xiblates que van entrellazándose acompañaes por una guitarra y un contundente bodhran.

Dende Estremadura lleguen "Los Niños de los Ojos Rojos", a los que yá pudimos ver n'Asturies nuna nueche de San Xuan en Corvera. Dende aquella actuación el grupu foi consolidándose, ensin renunciar al so estilu de folk contundente, que llevólos incluso a collaborar col grupu "Boicot". Dempués llega'l turnu de dos bandes asturianes bien conocíes, "Tejedor" van siguir presentando'l so "Llunáticos", y da-y pieslle a esta edición de la nueche folk d'Ayer "Dixebra".

La hora d'empiezu ta prevista que seya les diez de la nueche, pero pela tarde, dende les 19:30 hasta les 21:00 hores, va haber xuegos tradicionales organizaos pol Taller d'Emplegu Servicios Sociales y Culturales de Prosimidá. Amás la organización tien reservada una zona d'acampada p'aquellos que quieran quedáse depués del conciertu, y pa los que quieran colar, van tener buses dende les 5 hasta les 7 mañana dende Soto hasta Mieres y Felechosa parando pelos pueblos.