El Conceyu d’Avilés va debatir nun plenu estraordinariu’l futuru de la térmica

L'Ayuntamientu d'Avilés va debatir esti vienres nun plenu estraordinariu convocáu a petición del grupu del PP, el futuru de l'antigua central térmica d'Ensidesa, edificiu pal que colectivos sociales y políticos piden la declaración de Bien d'Interés Cultural y nel que yá tán faciéndose llabores previos a la so demolición, prevista pa los próximos díes.

La convocatoria del plenu estraordinariu tuvo llugar na Xunta de Portavoces que presidió l'alcalde, el socialista Santiago Rodríguez Vega.

El PP afirma que namás votaría a favor del derribu si se lleva alantre un proyectu pa facer nel mesmu sitiu una central térmica moderna. Amás del Partíu Popular, que tien nueve conceyales, la iniciativa va contar col sofitu del conceyal de l'agrupación ASIA, que ye miembru de la plataforma de defensa de la térmica.

Amás de grupos cívicos y políticos, entidaes como Icomos-Unesco, que ye'l Comité Español del Conseyu Internacional de Monumentos y Sitios de la UNESCO, esixeron nes últimes selmanes el caltenimientu de la térmica, que'l Gobiernu asturianu prometió nel añu 2004 convertir nun gran equipamientu cultural, una promesa que desapaeció en conociéndose'l proyectu p'Avilés del Centru Cultural "Oscar Niemeyer"