El Conceyu contra la Incineración entama un debate públicu en Xixón sobre la xestión de residuos

|

Los coleutivos integraos nel Conceyu contra la Incineración entamen un debate públicu en Xixón sobre la xestión de residuos na qu’esperen la participación de les formaciones polítiques principales. Ésti va tener llugar el miércoles.
 
‘La gestión de residuos en Asturies: un reto social y ambiental; la incineración' ye’l títulu d’esti debate col que’l Conceyu contra la Incineración/Consorcio Cívico pretende introducir esti tema na campaña eleutoral. “Esti debate ha de tar presente na campaña eleutoral y les fuercies polítiques que piden el votu a la ciudadanía tienen qu’esplicar los sos criterios y propuestes al respeuto, incluyendo la so posición al rodiu de la incineración”, espliquen dende esta plataforma, que convidó a los grupos polícos principales (PSOE, FAC, PP, IX, UPyD, Equo-LV y Bloque-UNA-LV-GV) a acudir a esti actu que va celebrase mañana, a les 19.30 hores, nel salón d’actos del xixonés Centru Municipal Integráu de L’Arena. Según espliquen nun comunicáu, nun esperen la presencia de los candidatos principales d’estos partíos al esti debate que va moderar Tita Cadavera, presidenta de la Federación d’Asociaciones de Vecinos de Xixón, pero sí qu’al menos éstos manden representación que sía quien a “esplicar los sos criterios y propuestes, lo qu’entendemos como dalgo natural y obligao nuna democracia”.
 
“La xestión de los residuos tien una relevancia especial nuna sociedá como la de nueso, y el Gobierno asturianu próximu ha de poner en marcha un plan autonómicu de xestión. Entendemos que la so ellaboración debe ser democrática y participativa, respondiendo a criterios claros de sostenibilidá social y ambiental; combinando, como faen los modelos europeos más avanzaos, la reducción, la reutilización y el reciclaxe”, apunten dende’l Conceyu contra la Incineración/Consorcio Cívico. Nesi sen, la plataforma afirma que “ye evidente” la esistencia d’un debate públicu sobre la opción de la incineración y recuerda que pese a que’l “proyeutu de Serín invalidóse xudicialmente” y supunxo “un coste superior a los 3 millones de euros”, Coxersa “paez empeñada en siguir manteniendo la incineradora como una alternativa eficaz”.
 
El Conceyu contra la Incineración/Consorcio Cívico ta formáu pola Asociación Asturiana de Amigos de la Naturaleza, l’Asociación de Ganaderos y Afectados por la Incineradora, l’Asociación para la Defensa de la Sanidad Pública, la Confederación de Asociaciones de Vecinos de Asturias, la Coordinadora Ecoloxista d'Asturies, Ecoloxistes n’Aición d’Asturies, Greenpeace Asturias, los Grupos de Medio Ambiente del 15M y la Unión de Consumidores Asturias.

Contador Estadistiques