El Conceyu Abiertu Pola Oficialidá presenta’l cartel pa la manifestación del 5 de marzu

Miles de carteles como'l que se reproduz xunta esta noticia van pegase per tolos conceyos d'Asturies a lo llargo de les prósimes selmanes col oxetivu de facer de la manifestación que ta convocada pal 5 de marzu n'Uviéu na estación de la RENFE un socesu "históricu na reivindicación del asturianu" según comentó a Asturies.com Xulio Casado, representante de la Xunta Pola Defensa de la Llingua nel Conceyu Abiertu Pola Oficialidá. La única reivindicación cola que se plantega la manifestación ye'l reconocimientu de la Oficialidá nel Estatutu d'Autonomía, la mesma reivindicación qu'apaez nel manifiestu del CAO, que sigue presentándose-yos a personaxes asturianos conocíos pol gran públicu. Dempués de recibir les firmes de grandes deportistes asturianos como Chechu Rubiera o Rosa Fernández, el manifiestu del CAO ta pasando peles manes de los músicos asturianos, siendo los dos últimos en poner la so firma Toli Morilla y el gaiteru Hevia.

D'otra manera, mañana sábadu 5 de febreru, a les 12,00 del mediudía preséntase nel Muséu de Belles Artes d'Asturies na Cai Santa Ana, Uviéu el "Observatoriu de la Política Llingüística"
Plataforma que se define como "un grupu de persones con representatividá nel mundu de
la cultura y políticu d'Asturies, interesaes en que se faigan efectives les posibilidaes reales d'avance qu'agora se dan pa la llingua asturiana, sin rocees y sin demores". L'Observatoriu espresa los sos oxetivos en términos de ser un grupu abiertu que va trabayar "a mou de conseyu asesor de la Oficina de Política Llingüística del Principáu, pero sin vinculación orgánica de nengún tipu, y siempre con un espíritu independiente, críticu y constructivu".