El Conceyu Abiertu Pola Oficialidá valora en positivo les sos últimes campañes

El Conceyu Abiertu pola Oficialidá, plataforma qu'axunta a cerca de 170 organizaciones polítiques, sindicales, sociales y culturales d'Asturies, col oxetivu de consiguir que na prósima reforma del Estatutu d'Autonomía se reconoza'l calter de llingua oficial de la llingua asturiana, dio ayeri una rueda de prensa pa valorar les sos últimes campañes reivindicatives.

Ello ye que dende la so presentación en xunu de 2004, el Conceyu Abiertu pola Oficialidá vien desarrollando actividaes y campañes bien estremaes, pasando per propuestes de diálogu, movilizaciones, campañes didáctiques y de concienciación o recoyides de firmes ente otros.

La Caravana pola Oficialidá, una de les iniciatives más nueves del CAO nesti sen, vien centrando'l llabor de la plataforma dende va unos meses p'acá, llevando la reivindicación de la oficialidá a tolos conceyos asturianos "d'una manera didáctica y atractiva, y cuntando siempre cola participación de les persones y organizaciones de los conceyos" según se destacó dende la organización. Ello ye que tres de les cuatro primeres caravanes pola oficialidá, la valoración del alcance que ta teniendo la iniciativa "supera con muncho les espectatives más optimistes" siendo que caúna de les caravanes "protagonizó l'actividá del día nel so conceyu, con cientos de persones participando o collaborando de manera solidaria na organización de les caravanes" según esplicó'l representante del CAO Fernando Ornosa, que resumió'l valor de la caravana en que "ta llogrando visualizar la reivindicación de la oficialidá y rescamplando l'apoyu mayoritariu que tien na sociedá asturiana".

Los representantes del CAO criticaron les postures contraries a la oficialidá de PSOE y PP, condenando nel casu de los primeros el que quieran acelerar el debate estatutariu pa evitar que se dea un debate internu nel so partíu sobre la oficialidá y nel casu de los segundos la so indefinición política sobre l'asuntu de la llingua.

La siguiente caravana pola oficialidá que se faiga va ser esti branu, col oriente asturianu d'escenariu, mientres qu'ente los actos reivindicativos previstos ta tamién una campaña de recoyida de firmes al favor de la oficialidá en llugares turísticos como'l Muro de Xixón.