El Conceyu Abiertu pola Oficialidá movilízase énte'l posible entamu de la negociación pol estatutu

Énte la inminencia del entamu del calandariu políticu pa la reforma del estatutu d'autonomía d'Asturies, la plataforma Conceyu Abiertu Pola Oficialidá ta apertando tola so capacidá de movilización col oxetivu de consiguir la mayor sensibilización social posible al favor del reconocimientu oficial del asturianu nel nuevu estatutu asturianu. Dientro d'esta campaña,el CAO organiza un festival reivindicativu, que va tener llugar esti vienres 7 dende les 7 y media de la tarde nel Teatru Filarmónica d'Uviéu.

L'actor Toño Caamaño y la cantante Esther Fonseca van facer de presentadores d'un actu que va entamar faciendo un "retratu de familia" colos representantes de les cerca de 150 asociaciones que tan inxertes nel CAO y la llectura d'un discursu pa pasar darréu a les actuaciones musicales, que van correr al cargu de la cantante de tonada Anabel Santiago, el cantautor Toli Morilla, el gaiteru Xuacu Amieva y el grupu de folk Felpeyu.

Los responsables del CAO afirmen qu'esti actu faise nun momentu en que teóricamente ta pa entamar el procesu de reforma colos primeros trámites na Xunta Xeneral del Principáu que s'albidra que van ser si non "inminentes polo menos mui cercanos". Otra cuestión ye cuando puea acabar esi procesu, y ello ye que, anque dende'l CAO se trabaya cola perspectiva de que se remate'l procesu nesta llexislatura, sábese qu'hai abondes posibilidaes de que quede pa dempués de les elecciones del 2007, anque como comenten fontes de la organización "nel panorama políticu asturianu, too pue cambiar nuna selmana".

Por ello, el CAO nun va dexar d'apertar pela vía de la movilización y la de la negociación pa consiguir el so oxetivu. Pela primera, amás del actu de güei y de los que suelen facese alredor de la selmana de les lletres, col puntu central na manifestación del día 5 de mayu coincidiendo col Día de les Lletres Asturianes, el CAO da anuncia de que va siguir coles convocatories de la "caravana pola oficialidá" movilización de concienciamientu y propaganda que yá anduvo pela cuenca del Nalón y per Siero y que se quier que pase per tola xeografía asturiana. Nel terrén de la negociación, dende'l CAO afírmase que, anque los contactos formales colos grupos parlamentarios asturianos tan pel momentu en suspenso, sí que se caltienen contactos informales con representan tes de los principales grupos políticos del país a la espera de qu'entame'l procesu negociador de la reforma estatutaria, momentu en que, dende'l CAO, albidren que van dase les condiciones afechisques pa un diálogu más formal.