El Conceyu Abiertu califica de "éxitu" la manifestación d’Uviéu

La organización cifra en más de diez mil persones la participación na marcha cívica qu'esta mañana salió a les 12 y media de la estacíon de la RENFE n'Uviéu en demanda de l'enxertamientu de la oficialidá na reforma l'estatutu. Ver equí les semeyes de la manifestación

El Presidente del Real Uviéu Club de Fútbol Manuel Lafuente, el caderalgu d'historia medieval de la Universidá d'Uviéu Javier Fernández Conde, l'economista José Alba, el cantante del grupu "Nuberu" Chus Pedro o Lisardo Lombardía, del Conceyu d'Estudios Etnográficos "Belenos" tuvieron al frente d'una marcha que remató na plaza de la Catedral d'Uviéu, onde José Antonio Lobato, del grupu teatral "Margen" lleó'l manifiestu de la convocatoria, nel que sorrayó la importancia del reconocimientu de la oficialidá na prósima reforma del estatutu d'autonomía como una de les últimes oportunidaes pa conseguilo y el valir del Conceyu Abiertu como plataforma unitaria nesti oxetivu, agradeciéndo-yos la participacióna tolos presentes.

Según declararon fontes de la organización de la manifestación a Asturies.com el CAO fai una valoración "mui positiva" de la convocatoria y alégrase de l'ésitu de la convocatoria nun día en que l'agua convidaba a quedar en casa. La organización de la marcha sorrayó la importancia de la manifestación en cuantes que demuestra que la sociedá asturiana ye capaz de llevar la iniciativa per delantre incluso de la clas política nun asuntu como'l de la reforma del estatutu, qu'entová nun echó a andar. D'otra manera, el CAO diz qu'esta nun ye más que la primera de munches manifestaciones y actividaes de reivindicación que van tener llugar d'agora en p'alantre nuna campaña que va dir "in crescendo" hasta que llegue'l momentu de la reforma estatutaria.

La marcha trescurrió con normalidá sacantes los incidentes que se vivieron con un grupu de manifestantes d'Andecha Astur a los que la organización nun dexó pasar per delantre d'otres organizaciones nel cortexu por nun ser esi partíu miembru del CAO. Un garapiellu de manifestantes d'AA intentaron adelantar a la manifestación con una pancarta propia, momentu en que-yos cortó'l pasu la seguridá de la organización, forcexando los unos colos otros ente les protestes de los manifestantes d'AA.