El coleutivu Softastur ufre la primer aplicación llibre pa móviles dafechu n’asturianu

|

Les persones que usen teléfonos Android yá pueden descargar la primer aplicación llibre pa móviles dafechu n’asturianu. Trátase d’una versión del diccionariu de l’ALLA desarrollada pol avilesín David Rodríguez Álvarez en collaboración con Softastur.
 
L’aplicación, que se carauteriza pola so cenciellez, usabilidá y por ocupar poco espaciu de memoria, tien una llicencia llibre GPL (General Public License) que permite l'accesu al códigu fonte a tol mundu pa poder ameyorala y enantala. “Dispón d'una caxa de consulta onde s'amuesa'l resultáu de la busca y un control de pallabres propuestes: cuando nun s'atope la pallabra buscada, amosará les suxerencies nuna llista”, espiquen dende’l coleutivu asturianu de software llibre.
 
Pal usu d’esta p’aplicación, que tamién cuenta con una opción nel menú que posibilita la copia del resultáu de la búsqueda nel portapapeles pa depués inxertalu nun mensaxe, corréu o documentu, namái ye necesario una conexón a Internet y disponer una versión 2.1 d’Android o superior. L’aplicación pue descargase de baldre nesta direición.

Contador Estadistiques