El CMPA diz que la emigración xuvenil nun se pue esmucir como en “Matrix”

Les declaraciones del presidente asturianu Álvarez Areces sobre la emigración xuvenil siguen criando polémica. El Conseyu de la Mocedá del Principáu d'Asturies recordó dellos datos sobre'l particular pa recordar que la "emigración xuvenil n'Asturies ye una realidá que nos preocupa y énte la que'l Gobiernu tien d'actuar de forma global. El CMPA diz que "les organizaciones sindicales tan denunciando públicamente que cerca de 30.000 mozos y moces abandonaron la comunidá autónoma nos diez años últimos, asitiando un estudiu de la central sindical UXT en 18.000 el númberu d'emigrantes asturianos ente'l 2003 y el 2004.

El CMPA critica la mala calidá del mercáu llaboral n'Asturies y remembra que "el mesmu Serviciu Públicu d'Emplegu afirma que la contratación temporal ye la característica del nuestru mercáu llaboral" y apurre datos del Conseyu Económicu y Social (CES) que diz nel so informe del 2003 que'l 56% de la perda de población n'Asturies dase nos tramos d'edá de 25-34 años, una perda que'l CES diz que se da poles dificultaes esistentes pa enxertase nel mercáu llaboral. La riestra de datos colos que'l CMPA quier demostrar que nun hai nengún mitu tres de la idea de la emigración xuvenil n'Asturies toma tamién los númberos del padrón municipal, que confirmen qu'Asturies foi la comunidá autónoma que perdió más población nel 2003. Más datos que confirmen la mala salú del mercáu llaboral asturianu y que dalos Eurostat, la oficina d'estadística de la UE que nun informe d'últimos del 2004 asitiaba Asturies como una de les 50 rexones europees con mayores tantos por cientu de paru xuvenil, en concreto'l 27%.

El Conseyu de la Mocedá nun entra a cuestionar los datos del informe sobre empleabilidá de los universitarios asturianos que firma'l profesor Joaquín Lorences, del que diz que ye "un trabayu sumamente interesante, que de xuro va aportar datos mui significativos en rellación al colectivu de titulaos universitarios" pero sí qu'echa peles declaraciones del Presidente del Gobiernu asturianu, que calificó'l fenómenu de la emigración xuvenil como una "lleenda urbana". Según el comunicáu del CMPA "Estos comentarios paecen más propios de persones que viven nun llugar virtual como Matrix. Los que vivimos día tres día n'Asturies somos conscientes dafechu que ye una realidá bultable la que vive l'actual xeneración de mozos que podríen pasar a la historia como la "xeneración del ALSA". Dende'l CMPA piden "una reflexón fonda y aposentada por parte del Gobiernu pa poner en marcha midíes y polítiques empobinaes a combatir el desemplegu y la precariedá"