El Cepesma recupera una utre envelenada

El Centru d'estudiu y protección de les Especies Marines (CEPESMA) y la guardería de mediu ambiente del Principáu soltaron nel día d'ayeri un exemplar d'utre que recoyeren axentes del serviciu de la naturaleza de la Guardia Civil de de Tinéu con posibles síntomes d'envelenamientu.

Los veterinarios del Cepesma vieron que la utre presentaba una hemorraxa interna y problemes sicomotrices y neurolóxicos, precisando'l páxaru d'entubamientu pa l'alimentación los 3 primeros díes, nun siendo hasta dempués de seyes díes de tratamientu que'l páxaru se recuperó dafechu, soltándose otra vuelta nel llugar onde s'alcontró.

Los técnicos del Cepesma dicen que la utre, que llegó al centru dando poco menos que les boquiaes, apaeció cerca d'El Cruceru, en conceyu Tinéu, xunta un potru muertu supuestamente por ataque de llobos.

El Cepesma diz que nun ye la primer vegada que darréu de la muerte d'una res apaecen raposos y otros animales carroñeros muertos por envelenamientu, y aporta como prebes d'ello l'apaición, de va dos meses p'acá, de melandros, raposos y pegues muertos o morriendo per tol centru d'Asturies, siendo en munchos casos "bastante palpable" pal Cepesma la rellación ente denuncies por ataques de llobos al ganáu y l'apaición d'animales muertos pol velenu.

L'usu de velenu col ganáu propio col envís de sacar perres de posibles indemnizaciones ye una práctica yá cásique desaniciada y un engañu qu'amás ye fácilmente detectable por cualquier peritaxe de daños medianamente bien fechu, pero dacuando siguen apaeciendo casos d'esta práctica que supón un grave dañu pal mediu ambiente en cuantes que la tresmisión del velenu nun apara nel res muertu y pue llegar hasta munchos elementos más de la cadena alimentaria