El Centru d’Asturies en Bilbao organiza un ciclu de conferencies

El Centru d'Asturies en Bilbao entama dende'l prósimu día 30 un ciclu d'actividaes culturales qu'anicia'l prósimu día 30 de marzu cola inauguración d'una esposición sobre apicultura al cargu de la obra social y cultural de Caxastur en Bilbao. Al día dempués d'ello, el periodista Miguel Ángel Naredo va falar sobre la Comarca de la Sidra como destín turísticu. La lliteratura y poesía asturianes entren al ciclu cola charra que va poner el 1 d'abril Xurde Álvarez, mientres que'l día 2 va ser el turnu pal Alcalde de Cabranes Alejandro Álvarez, que va falar de los museos etnolóxicos d'Asturies, centrándose tamién nel entornu históricu del Conceyu Cabranes.

Tres d'un día de descansu, el 4 d'abril el locutor de la SER Paco Bercial va dar una conferencia sobre escursiones y recorríos per Asturies, un tema nel que va afondar el día 5 Cesar Alvarez Fernández de l'Asociación Asturiana de Periodistes y Escritores de Turismu. Pal día 6, toca un cambéu de temática con Pedro Quirós Montes y Aquilino Gonzáles Fernández, agricultores y emprendedores que tan sacando alantre un negociu d'agricultura ecolóxico en Conceyu de Sariegu. El día 7 la doctora Carmen Bilbao va dexar la temática dafechamente asturiana pa falar sobre la prevención d'enfermedaes al traviés de l'alimentación, mientres que la última charra del ciclu va tocá-y dala a Luis Antonio Elías, periodista gastronómicu que va falar sobre cocina asturiana.

Toes estes conferencies van tener llugar nel Salón de Actos del dto. 4 de Begoña del Ayuntamientu de Bilbao asitiáu na Cai Circo Amateur, Club Deportivo, 2 48004 Bilbao-Txurdinaga. Como pieslle del ciclu, el sábadu 9 d'abril a les 18:30h nel Salón de Teatru el Carmen d'Indautxu la Compañía Asturiana de Teatru va llevar al escenariu la obra "Los Carromateros" d'Eladio Sánchez