El CAO prepara un festival reivindicativu pal 7 d'abril nel Teatru Filarmónica d'Uviéu

La plataforma Conceyu Abiertu pola Oficialidá (CAO) na que s'axunten más de cien organizaciones polítiques, sociales y culturales col oxetivu de llograr el reconocimientu oficial del asturianu na próxima reforma del estatutu d'autonomía, va celebrar estos díes dellos actos dientro de la so campaña de concenciación y espardimientu de los sos oxetivos a la sociedá asturiana.

Asina, el CAO va entamar pa esti sábadu día 1 d'abril una segunda edición de la Caravana pola oficialidá, tres del éxitu de la primera que se desarrolló pela Cuenca del Nalón. El recorríu informativu va salir a les 11 de la mañana de la plaza'l mercáu de La Pola, pasando per tol conceyu de Siero y allegándose los coches tamién a delles parroquies d'otros conceyos qu'atiesten con esti.

Pa la selmana qu'entra, el CAO tien preparáu un festival nel Teatru Filarmónica d'Uviéu que va celebrase'l vienres 7 d'abril a les 19:30 de la tarde. Nelli, amás de los discursos y mensaxes reivindicativos, va contase coles actuaciones de dellos artistes, ente ellos la cantante de tonada Anabel Santiago, el cantautor Toli Morilla, el gaiteru Xuacu Amieva y el grupu de folk Felpeyu.