El CAO píde-y a Javier Fernández qu’atienda pa lo que diz la UNESCO y reconoza la igualdá de derechos pal asturianu

Les declaraciones realizaes nel últimu congresu de les Xuventúes Socialistes pol secretariu xeneral de la FSA Javier Fernández nes que rellacionaba reivindicación de la llingua asturiana cola existencia d'un proyectu nacionalista y aseguraba que nun hai falta de "glorificar" l'idioma nun sentaron gota bien nel sen del Conceyu Abiertu pola Oficialidá, plataforma cívica qu'esi mesmu día salía a la cai nuna manifestación na que miles de persones volvíen a llevar la esixencia de la oficialidá del asturianu al terrén públicu. Asturies.com faló con Fernando Ornosa, portavoz del CAO, que criticó duramente les palabres del líder socialista.

Pa Ornosa "ye murnio qu'un dirixente socialista fale d'intolerancia pa referise a la postura d'una parte de la sociedá que s'espresa de manera cívica". El responsable del CAO entruga a Fernández cual ye la razón pa que los falantes d'asturianu nun tengan los mesmos derechos que los d'otres comunidaes con llingua propia y niega que se trate de facer nenguna glorificación col idioma cuando en realidá lo único que se pide ye que se reconoza un principiu d'igualdá de derechos que "ta rotu". Ornosa recomiénda-y a Fernández que llea la Carta Europea de les llingües o les recomendaciones de la UNESCO sobre l'asturianu y que dexe de facer llevantos atribuyendo a la reivindicación del asturianu rellación con proyectos nacionalistes.

Especialmente graves-y paecieron al representante del CAO les palabres de Fernandez en qu'aseguraba que "el raigón de la intolerancia finca na sobrevaloración de lo propio", una espresión que pal representante del CAO supón "echar lleña al fueu" contra un movimientu que lleva más de trenta años espresándose democráticamente" y que garra un significáu más claru a la vista de la declaración de "cosmopolitismu" de Fernández, qu'Ornosa calificó de "tremenda". Pa Ornosa "cosmopolita ye'l qu'aprende a conocer l de fuera apreciando lo propio, y negase a conocer lo propio lleva a ser un babayu".

Tocante a l'actualidá del CAO tres de la manifestación del pasáu sábadu, Fernando Ornosa adelantó que va pidise una entrevista col nuevu secretariu de les xuventúes socialistes, Nino Torre, pero llamentó que la comunicación cola FSA-PSOE tea rota dafechu. El CAO si tien contactu cola otra gran formación política asturiana, el PP, pero Ornosa nun ye escesivamente optimista sobre'l posicionamientu d'esti partíu énte la cuestión de la oficialidá, que calificó de "indefinida y ambigua". L'afoguín electoral que va marcar la vida política d'equí a les xenerales del mes de marzu va condicionar munchos de los movimientos que pueda facer la plataforma nos próximos meses, dalgo colo que cuenta'l CAO na ellaboración de la so axenda más inmediata.