El campu del Llagostera pudo con un Real Avilés desconocíu (3-0)

L’Avilés nun supo caltener la ventaya de dos goles del partíu d’ida énte un Llagostera fechu a la midida del so campu y diz adiós al ascensu a Segunda División A. En Tercera, l’UP Langreo eliminó al Haro y l’UC Ceares tuvo opciones.

 

Les dimensiones reducíes del Municipal de Llagostera, de 95x60 polos 105x65 del Suárez Puerta, y el fechu de ser de prau artificial, llevó a Josu Uribe a celebrar per selmana dos sesiones de trabayu n’El Candín, campu del CD Tuilla de condiciones asemeyaes. Visto lo visto ayeri en Catalunya, nun resultaron suficientes, yá que l’Avilés en nengún momentu llogró adaptase al terrén de xuegu, viéndose superáu dende’l primer minutu por un Llagostera qu’amosó por qué ye intratable en casa, onde suma una derrota en tola temporada (1-2 col Huracán). Un remate de cabeza nel segundu palu d’Enric Pi tres un córner botáu por Pitu nel 15 del partíu pesó muncho nel equipu avilesín, que cinco minutos depués nun supo depefender una contra llocal qu’acabó nos pies de Chamorro, con disparu al poste y rechace favorable pa tocala a gol sobre la llinia. Diben 20 minutos y el Llagostera yá igualaba la eliminatoria.  

 

Un gol, sicasí, daba’l pase al Avilés, que trató de dominar ensin fortuna énte un conxuntu llocal que buscaba aprovechase de les condiciones del campu. L’escalabru llegaría nel minutu 55, con una falta llanzada con potencia por Pitu dende terrén propiu que pilló adelantáu a David. El públicu llocal celebró’l tantu como si fora’l definitivu, anque un gol siguía sirviendo al Avilés. Hasta’l final del partíu, el poderíu aéreu de la defensa azulgrana bastó pa evitar los intentos desesperaos de los d’Uribe, que víen como se-yos escapaba’l sueñu de xugar la temporada próxima en Segunda División A. Les dos places llibres, tres los ascensos del Real Racing Club de Santander y Albacete –campeón de la categoría depués de ganar por un global de 4-3 a los cántabros–, van salir de les eliminatories qu’enfrenten al Nàstic y al Llagostera, y a L’Hospitalet y Leganés.

 

El Llangréu, a la ronda final

 

L’únicu sobreviviente asturianu nes fases d’ascensu, nesti casu a Segunda División B, ye’l Llangréu, que remontó un 1-0 en contra col Haro en Ganzábal. Los de Pablo Lago llograron igualar la eliminatoria nel primer minutu, tres una bona combinación que finó con un tiru dende la frontal del área de Nacho Méndez. Dende esi momentu, salvo dalgún sustu aisláu, los azulgranas llevaron los tiempos del partíu, anque ensin arriegar n’ataque, siendo lo más destacao un disparu al palu de Mendi enantes de llegar al descansu.

 

Tres los quince minutos de rigor, y col apoyu de los 2.000 aficionaos que se xuntaron nes graes de Ganzabal, el Llangréu punxo una marcha más hasta consiguir el tantu definitivu, que llegó nel 70, cuando un serviciu de Pablo Acebal foi rematáu pol goliador Chus nel segundu palu. Lo más difícil yá taba fecho, pero un gol eliminaba a los llocales, que sufrieron hasta l’aliendu últimu: col tiempu acabáu, Guillermo fixo dos paraes providenciales que llevaron la llocura a Ganzábal. Tres dexar fuera al Atlético Monzón y al Haro, el Llangréu espera esta tarde al rival de la eliminatoria definitiva pa xubir a Segunda B.

 

Nella nun va tar el Ciares pese a que rozó la fazaña n’Alcorcón. Un resbalón de Borja Noval a la hora de llanzar un penalti que dexaba con un home menos al Trival Valderas –equipu yá de Segunda B tres el descensu a la categoría de bronce del Castilla, qu’arrastra al Real Madrid C a Tercera– impidió’l 1-3 nel marcador cuando restaben 18 minutos pal final del choque. Finalmente, nel tiempu añadíu, Óscar –autor de dos tantos en La Cruz– colocaba’l 2-2 definitivu nel marcador, siendo’l global de la ronda de 5-2 pa los madrilanos. Enantes, Palacios adelantó a los llocales (minutu 44) y Ponte (minutu 61) y Juan Carlos (minutu 64) fixeron suañar a los 200 ciaristes desplazaos a Castilla. 

 

Na semeya, Borja Prieto llucha por un balón con un xugador del Llagostera. Imaxe propiedá del Unió Esportiva Llagostera.