El cambéu climáticu pue "mediterraneizar" Asturies

La Oficina Española de Cambéu Climáticu del Ministeriu de Mediu Ambiente y el Departamentu de Ciencies Ambientales de la Universidá de Castiella-La Mancha presentaron ayeri, na viéspora del día d'entrada en vigor del protocolu de Kyoto, que ye güei, un informe sobre los efectos que va tener el cambéu climáticu n'España a lo llargo del sieglu XXI

Amás de la xuba de les temperatures y la mengua de les precipitaciones, el calecimientu planetariu va provocar una baxada grande de la biodiversidá, afectando sobremanera a la pesca y daños importantes sobre la salú humano

L'estudiu plantea dos escenarios posibles, el primeru parte del presupuestu de qu'emisiones a l'atmósfera de gases d'efectu invernaderu van ser nel 2100 un 120% más altes que les actuales. El segundu encóntase nuna perspectiva más optimista pola qu'esa xuba d'emisión de CO2 y otros gases contaminantes va ser "namás" del 100%

Asturies va ser de les partes de la península onde menos se note l'efectu del calecimientu. Asina, mientres nel interior de la península les temperatures van xubir ente 5 y 7 graos pel branu y ente 3 y 4 pel iviernu, pa la fachada cantábrica a la mar les previsiones falen d'ente 2 y 4 graos. En cuantes a l'agua, l'informe fala d'una posible xuba pluviométrica nel iviernu, pero'l branu va ser muncho más secu.

El cambéu climáticu pue operar amás nel casu d'Asturies con una "trampa". Ello ye que l'estudiu adelanta la producción agrícola pue xubir a lo llargo de la primer metada del sieglu al xubir cola temperatura l'actividá de los organismos vivos y poner en circulación más materia orgánico de les plantes al suelu, pero, de magar l'añu 2050, la perda de masa vexetal y de viesca autóctono pue llevar al rau d'ello l'aprobecimientu del suelu, metiéndonos dafechu nun procesu que l'estudiu llama directamente de "mediterraneización"

Como zona costera, Asturies pue enfrentase a un problema grave pola xuba del nivel del mar, que l'informe oficial del ministeriu cifra ente los 10 y los 68 centímetros, anque l'escenariu más pesimista fala de que'l nivel podría xubir un metru, cubriendo bien de playes a lo llargo de tola costa cantábrica. Peor lo tien el delta del Ebro en Cataluña, que s'enfrenta a la so posible desapaición.

Ente los efectos sobre la salú humano, l'estudiu fala d'una xuba de la mortalidá por fola de calor y d'enfermedaes tresmitíes por mosquitu, casu del dengue o la malaria y por garrapata, casu de la encefalitis. Con too y con ello, el problema más grande que pue venir nel casu concretu de delles zones d'Asturies pue ser la xuba de concentración en capes baxes de l'atmósfera de gases contaminantes.

L'estudiu completu pue descargase na web del Ministeriu del Mediu Ambiente