El bon estáu de conservación de la momia d'Urraca l'Asturiana

Urraca l’Asturiana, fía ilexítima del rei Alfonso VII, reina d’Asturies ente’l 1153 y el 1165 y rebelde xunto con Álvaro Rodríguez contra’l monarca Fernandu II de Lleón pa independizar el reinu, descansa dende'l 1532 na capiella del Sagrariu de la catedral de Palencia. El so sarcófagu ta acabante de ser reformáu, lo que permitió estudiar otra vuelta la so momia, de la qu'había una semeya y un dictame fechos nel 1896.

Como informa Antonio Rubio López na páxina de la Diócesis de Palencia, el féretru, en madera policromada, baxóse del so allugamientu pa participar na esposición ‘Renacer’, ún de los actos programaos pol Cabildo Catedral de Palencia pa celebrar los 700 años de la colocación de la primer piedra de la catedral gótica’l 1 de xunu del 1321. Al so fin, y enantes de devolver el sarcófagu colos restos d’Urraca l’Asturiana la so cornisa, procedióse a facer dalgunes reparaciones al decatase de que la tabla del fondu presentaba signos de deterioru y debilitamientu, de lo que s’encargaró la restauradora d’arte Celia Rosa García.

Aprovechando estos llabores, el serviciu fotográficu de la Diócesis de Palencia y de la Catedral tomaron semeyes de la operación y, lo más importante, del estáu de la momia de la reina, yá que la única fotografía esistente hasta agora databa del 11 d’avientu del 1896. Fíxose nuna sesión científica que se celebró por deséu de la Real Academia de la Historia.

El doctor Francisco Simón Nieto, secretariu de la Comisión de Monumentos, procedió al esame de los restos, ellaborando un dictame qu’afitaba que “la momia de doña Urraca medía un metru y seiscientos ventidós milímetros, tenía los brazos cruciaos sobre la cintura, les manes yeren pequeñes y fines y les piernas rectes y fuertes, la so cara ovalada, con güeyos non mui grandes y la barba redonda y pequeña. Lo que más llamaba l’atención yeran los estensos perímetros torácicu y abdominal, sobre manera l’últimu, con relieves tan acentuados que permiten asegurar la corpulencia y obesidá d’esta señora”.

El testu sigue apuntando que “la obesidá, anque grande, nun yera deforme, sinón simétrica y ordenada y encaxa bien na aventayada estatura, na rixidez esbelta d’una dama con un espinazu que tuvo mui pronunciada la curvatura lumbar. El volume de tou’l troncu y de los miembros, especialmente l’inferior, contrasta col desarrollu fisiolóxicu de l’actividá cefálica y la finura y delicadeza de les manos y los pies”.

Semeyes propiedá de la Diócesis de Palencia, la inferior firmada por Antonio Rubio López.