El BNG quier facer convenios con Asturies pa fomentar el gallegu nel Navia-Eo

El coordinador del grupu parlamentariu del BNG, Bieito Lobeira presentó ayeri les iniciatives del so grupu políticu pa potenciar l'usu del idioma gallegu n'Asturies y Lleón, onde declaró que vive una comunidá de gallegofalantes de cerca de 80.000 persones. Lobeira afitó la voluntá del BNG de firmar "convenios col Principáu d'Asturies y col Conseyu comarcal del Bierzo" pa fomentar la llingua gallega. El dirixente del BNG pidió qu'estos convenios contemplen l'emplegu del gallegu poles autoridaes de los conceyos , la ufierta de cursos pa trabayadores de la función pública, la recuperación de la toponimia, la ellaboración d'estudios sociollingüísticos, la meyora de la recepción de señal de la TVG y el qu'esta inxerte programación específica pa la zona.

Pa llevar alantre estes midíes, el BNG va presentar al traviés del so grupu parlamentariu propuestes non de llei énte la Cámara autonómica gallega pidiendo que se revise'l conveniu de collaboración sobre enseñanza del gallegu nel Bierzo firmáu con Castiella y Lleón nel añu 2001. En palabres del diputáu gallegu, la so iniciativa nun ha vese como una invasión de les competencies d'otres comunidaes en cuantes que "Nun se trata de terminar con otres cultures, pero sí d'evitar que desapaezan otres" .