El Bloque refuga’l despíu de trabayadores se subcontrates mineres

El Bloque por Asturies amosó'l so rechazu a los despidos, na minería privada y na pública, de les subcontrates mineres. Dende BA señalen qu'esos despidos “son la punta de llanza del zarru de la minería asturiana".

Según BA, la situación va agravar pola finalización de los espedientes de regulación abiertos qu'amenacia con llevase per delantre'l millar d'empleos de producción esistentes. BA manifestó la so esmolición por esta situación al empar que demanda a les partes implicaes que se busque una solución pa estos trabayadores, la mayor parte d'ellos con más de 20 y 15  años de mina, especialmente nos llabores d'arranque del carbón.
  
El BA recuerda que nel Plan del Carbón 2006-2012, yá se contemplaba la consideración de los trabayadores de les subcontrates como escedentes del sector "según los criterios qu'aplique la Subcomisión d'Adaptación Llaboral". Pero, a fecha de güei, esos criterios siguen ensin determinase, polo cual, resulta "absolutamente fundamental" pal futuru d’estos trabayadores y les sos families que dicha Subcomisión afite los criterios pertinentes pa, d'esta manera, desbloquiar la situación actual, considerando a esti trabayadores como escedentes mineros a tolos efectos.
  
Dende'l BA señalen qu'esa situación ye frutu de la encruciada llegal na que s'atopa'l sector del carbón. Con éses les consecuencies de la demoranza na aplicación del Real Decretu de Garantíes de Suministru y l'aprobación del nuevu Reglamentu de la Comunidá Europea que venceya les ayudes al zarru de les esplotaciones "tán na fonderada d'esta situación, siendo los trabayadores de les subcontrates la punta de llanza del zarru final de les esplotaciones mineres n'Asturies".
  
"Nun dexa de ser llamativu que quien saludaron la firma del nuevu Reglamentu de la Minería del Carbón como una victoria pal sector mineru asturianu y español, tean, agora que s'averen les elecciones autonómiques y locales, llamando a la creación d'un frente pa tratar de modificar dichu Reglamentu, nuna demostración de cinismu políticu ensin precedentes", comentó.
  
Sofitar acciones
El Bloque por Asturies que, namás conocer el testu del Reglamentu aprobáu, s’asitió a la escontra, alvirtiendo que lo aprobao significaba la sentencia de muerte  pa la minería asturiana, señaló que va sofitar cualquier acción tendente a modificar el treme normativu.