El Bloque investiga la rellación ente José Luis Moreno y el Principáu

|

El voceru del Bloque por Asturies, Rafael Palacios, esplicó esti xueves qu'el so partíu va siguir investigando la "evidente" rellación qu'esiste ente'l responsable de la productora Kulteperalia, José Luis Moreno, y el Gobiernu del Principáu.

En rueda de prensa, Palacios criticó los más de 600.000 euros que l'Executivu pagó polos actos del Día d'Asturies y la gala qu'emitió la televisión autonómica, de los que 123.500 correspondientes a esta última  regaláronse-y al "amigu" José Luis Moreno, por un eventu "nefastu" que se-y encargó "ensin contratu, nin procesu d'axudicación".
  
Acompañáu pol diputáu Roberto Colunga, consideró que la nueva etapa de La Llaboral ye "la constatación más evidente del fracasu de l'apuesta estrella del Gobiernu del Principáu en materia de cultura".
  
Nesti puntu, dixo que si los responsables de dicha programación "abandonaren per una sola vegada la prepotencia y escucharen les crítiques", Asturies podría aforrase "un ridículu y millones d'euros".
  
Amás, el portavoz del Bloque llamentó que'l dineru vaya destináu a actividaes “minoritaries y esclusives", a les qu'asisten siempres "les persones de mayor nivel económicu", "subvencionaes" pol Gobiernu asturianu y con un costu que sale a los asturianos a "más de 300 euros per cabeza".
  
Fast food de la cultura
Palacios reprochó amás la “hipocresía política" de los qu’aseguraron que'l proyectu de La Llaboral "nun camuda no sustancial", porque la nueva programación, contratada al productor madrilanu, fixo que Xixón pasara "de la vanguardia de la vanguardia a un fast food de la cultura".

"Queremos saber cuántu s'embolsa y cuántes actividaes encargar a esti supuestu empresariu", sentenció’l nacionalista, que sorrayó que sobre esti tema tovía falta “muncho por saber”.
 
La esplicación que Rafael Palacios fizo sobre too'l procesu pue sentise nesti audiu
 

Contador Estadistiques