El Bloque denuncia que’l presupuestu asturianu ye “una mentira”

Bloque por Asturies considera que la propuesta de presupuestos autonómicos presentada pol Gobiernu asturianu ye "una mentira", pues va rebaxase en 400 o 500 millones dempués de les próximes elecciones autonómiques de mayu.

La organización consideró que se trata d'una operación de "inxeniería cosmética" de calter electoralista.
  
Asina lo señaló'l voceru del Bloque, Rafael Palacios, mientres la rueda prensa ofrecida xuntu col diputáu autonómicu d'esta organización, Roberto Colunga, pa presentar les trés enmiendes que la organización plantegó a les lleis de Presupuestos Xenerales pal 2011, de Midíes Alministratives y Tributaries d'Acompañamientu a estos presupuestos, y de cambiu de la Llei d'Ordenación de la Función Pública del Principáu.
 
"Como sabemos cómo s'escriben los presupuestos, porque participamos nos del 2010, avanzamos qu'estos que s'aprueben agora dempués de les elecciones de mayu de 2011 van recortase en 400 o 500 millones d'euros", quiso adelantar el voceru del Bloque. "Son pura ficción y a lo último van recortase no de siempre: empléu públicu, sueldos y polítiques sociales".
 
Dende'l so puntu de vista "tán basaos en previsiones irreales y ficticies d'ingresu y tán inflaos". "Detrás d'estes cuentes nun hai sólo inxeniería financiera, sinón fundamentalmente cosmética financiera. Ye un presupuestu mentirosu, apautáu na escuridá de los que quieren engañar a la sociedá asturiana", calcó.
  
Destacó delles midíes "terribles", como "l'aprobación de la llei d'axuste, que pon en peligru la sanidá y l'educación, los graves recortes en salarios, y el caltenimientu de toos y caún de los chiringos socialistes que s'apoyen nos llombos d'IU-Verdes".
  
Amás, criticó que "s'acuten fondos pa la construcción de la incineradora, que yá naz con sobrecostos, siguen calteniéndose los chiringos de siempre, regálense millones d'euros (2,5 millones) a los partíos del réxime pa que se sigan financiando, y avánzase hacia la privatización de servicios esenciales y de l'alministración pública asturiana, na que, nel 2011 van empezar hasta les EET a trabayar".
  
"Lo único que pretenden", según Palacios, "ye consiguir una paz ente socios de gobiernu, coles mires de que la FSA puea dedicar lo que queda hasta mayu n'esclusiva a promocionar al so candidatu, muncho menos conocíu que l'actual presidente".

Llegalizar la "deucracia"
Roberto Colunga acusó al Gobiernu autonómicu de pretender llegalizar el nomamientu "a deu" de cargos de confianza, esto ye, la "deucracia", por cuenta de la Llei d'Organización de la Función Pública.

El gobiernu del Principáu del PSOE y IU-Verdes pretende copiar "el métodu de Camps (presidente de Valencia), modificando la Llei de Función Pública Asturiana, pola que se noma de llibre designación a la totalidá de xefes de servicios, coordinadores, asesores y demás personal".
  
"El PSOE y IU-Verdes propónense llegalizar el sistema anuláu pola Xusticia Asturiana (en delles sentencies), y por actu d'una traca final de clientelismu exhibicionista que surda de les urnes de mayu de 2011", criticó'l diputáu.
  
Dende'l so puntu de vista, "dexa una posición delicada a IU-Verdes". Asina recordó que nel programa electoral d'esta coalición establecíase "acabar col clientelismu funcionarial", puntu que Palacios lleyó testualmente.
  
Migoya “intoxicadora”
El voceru del Bloque acusó amás a la conseyera d'Alministraciones Públiques, Ana Rosa Migoya, de ser la "intoxicadora" oficial del réxime, por reprochar a esta organización que formó parte del Gobiernu y que tamién nomó "conductores". "Los cargos del Bloque nunca tuvimos coche oficial, y cuando utilizamos algún tipu de vehículu díbamos col conductor que se mos ponía, el que tocaba. Nun teníamos coche que nos llevara a buscar a casa, o de copes o de compres, como faen dellos miembros del gobiernu", quiso esclarar.
  
"Nunca nomamos xefes de servicios, porque nunca los tuvimos, y cuando mos tocó nomar a alguién convocamos concursos", añadió. Según Palacios, "ye ella (Migoya) a la que'l Xulgáu contencioso-alministrativu d'Uviéu diz que va a multar por incumplir sentencies, nomar a deu y inorar concursos de méritos y capacidá".