El Bloque califica de “pantomima” la creación d’una comisión pa investigar el ‘casu Marea’

Les declaraciones del presidente del país, Javier Fernández, sobre’l ‘casu Marea’ sorpendieron al Bloque por Asturies. La formación nacionalista califica de “pantomima” la creación d’una comisión parllamentaria pa investigar esti asuntu.
 
Manuel Benayas, voceru del Bloque, fai referencia a les pallabres del dirixente socialista nes que señaló que tres el ‘casu Marea’ escuéndese’l "emborollu inútil, la sospecha fácil y la difamación gratuita”. Estes declaraciones sorprenden a los nacionalistes pol fechu de que “a estes altures esiste un bon númberu de ramificaciones y imputaos depués de que’l xuez Sorando dictara un autu nel qu’esixe a siete de los implicaos, ente los que s’alcuentren un ex conseyeru socialista, una direutora xeneral de confianza máxima nomada por un Gobiernu socialista, ex encargaos de compres en conceyos socialistes, etc., 3,4 millones d’euros”. Nesi sen, Benayas considera que l’actitú de Fernández “ye un intentu groseru de tratar de llanzar balones fuera pa negar la responsabilidá política nidia del so partíu nestos fechos”.
 
“Cuando dexa entrever nes sos declaraciones que siguir esixendo l’aclaración y depuración de estos fechos ye ‘siguir dando ales a la desafeición política’, yá nun resulten namái inquietantes, sinón qu’amás resulten especialmente condenables, yá que, desaniciar la corrupción, denunciala, investigala y perseguila hasta les sos consecuencies últimes ye, o debería de ser, una de les preocupaciones máximes de quien va gobernar Asturies nos años próximos”, continúa’l voceru del Bloque, qu’opina que quien da ales a la desafeición política “nun son quienes demanden l’aclaración y persecución de la corrupción, sinón los políticos corruptos y aquellos partíos comprensivos con ellos; aquellos qu’impulsen lleis como la de la Función Pública Asturiana, que lo único que pretenden ye’l control políticu de los funcionarios, permitiendo la esistencia de una Alministración Pública na que nun se detecten factures dobles de los mesmos contratos, nin factures sobre contratos inesistentes o factures d’obres que nun se faen”. Por último, los nacionalistes insisten en que la creación d’una comisión parllamentaria a estes altures del procesu xudicial paez-yos “una pantomima y una simple tapadera, tanto por parte d’UPyD, que busca un protagonismu como azote de la corrupción ensin qu’hasta agora fixera absolutamente nada, como del PSOE, que busca llavar la so imaxe nos fechos”. Nun s’escaecen tampoco del restu de fuercies parllamentaries “si l’apoyasen pa tratar d’escurecer ante la opinión pública’l fechu evidente de la esistencia d’un procedimientu xudicial que, de la mano del xuez Sorando, y cola participación de les acusaciones particulares, ente les que ta un solu partíu, el Bloque por Asturies, avanza cada día na aclaración de los fechos y na determinación de les responsabilidaes”.