“El bipartitu refuga, elimina y escuende l’asturianu n’Uviéu”, denuncia Valiño

|
Diego Valiño Plenu Uviéu oficialidá

“El Plenu d’ayeri foi mui triste, tanto pola cuestión del asturianu como pola non conderga de l’agresión homófoba a Kevin”, resume Diego Valiño. L'edil socialista, que defendió una enmienda de modificación a la proposición de PP y Ciudadanos contra la oficialidá, denuncia que “el bipartitu refuga, elimina y escuende l’asturianu n’Uviéu”.

Dicha proposición, que contó col apoyu de VOX, afitaba nel puntu 1 que “el Plenu del Conceyu d’Uviéu alcuerda reiterar el so compromisu cola llingua tradicional asturiana –bable/asturianu, gallego/asturiano–, y les variantes llocales, entamando dientro del marcu establecíu nel Estatutu d’Autonomía y la Llei 1/1998 de 23 de marzu, d’Usu y Promoción del Bable/asturianu, les polítiques necesaries pa potenciar d’una manera efeutiva la proteición y promoción d’un bien cultural singular como ye’l bable/asturianu”. Unes normes que l’equipu de gobiernu municipal defenden cumplir pero que, en realidá, nun ye asina.

“Nun hai nenguna política llingüística. Retiróse la partida a l’Academia de la Llingua Asturiana; oculten el topónimu Uviéu, que nun dexen emplegar a los equipos deportivos de la ciuda; eliminen la plaza de Coordinador en Llingua Asturiana…”, enumera Valiño, que recuerda qu’hai dos instrucciones d’alcaldía vixentes que nun s’apliquen. Éstes son la rotulación de vehículos col topónimu oficial billingüe y l’usu de la toponimia tradicional.

Proposiciones socialistes

La enmienda de modificación del PSOE a la proposición presentada por PP y Ciudadanos, que nel puntu 2 incluyía que “el Plenu del Conceyu d’Uviéu alcuerda refugar l’intentu d’incluyir la cooficialidá de la Llingua dientro de la reforma del Estatutu d’Autonomía, por nun ser prioritariu pa la inmensa mayoría d’asturianos”, presentaba delles aiciones pa iguar la deriva esistente anguaño col bipartitu. El cambiu del logotipu oficial del conceyu pa facelo billingüe; la recuperación de la collaboración cola Academia de la Llingua Asturiana; l’entamu de cursos nel marcu de la Universidá Popular; l’emplegu de ‘Antroxu’, ‘L’Ascensión’ o ‘San Xuan’ pa estes fiestes tradicionales que se promocionen colos nomes en castellanu; l’usu de la toponimia; la presencia del idioma nes actividaes del Xacobéu, o la rotulación de vehículos municipales y el so emplegu nos cartelos, yeren dalgunes d’elles.

D’igual forma, dicha respuesta, que contó col sofitu de Somos y el refugu de PP, Ciudadanos y VOX, tamién establecía qu’el “Plenu del Conceyu d'Oviedo/Uviéu considera que ye'l momentu d'avanzar na oficialidá del asturianu como elementu fundamental pa la so dignificación normativa, la so normalización social y la so propia supervivencia. Nesti sentíu, encamentamos a les distintes fuercies polítiques con representación parlamentaria na Xunta Xeneral a avanzar nes negociaciones col fin de consiguir un ampliu alcuerdu que reconozca la oficialidá del asturianu na próxima reforma del Estatutu d'Autonomía” y afalaba “a la Xunta de Gobiernu a cumplir cola normativa vixente mientres l'Estatutu d'Autonomía nun seya modificáu”.

“El bipartitu refuga, elimina y escuende l’asturianu n’Uviéu”, sentencia Valiño, que critica la “hipocresía y cinismu” amosada pol equipu de gobiernu del PP y Ciudadanos y los pasos atrás daos “en tolos temes” con respeuto la llexislatura pasada, citando como exemplu’l Bulevar de Santuyano o La Vega. “Ye mui triste. Sales d’un Plenu como ayeri y paez que nun tamos nel 2021 poles polítiques que defende la derecha”, insiste l’edil socialista.

Na imaxe, Valiño nel Plenu d'ayeri.

Contador Estadistiques