El Bancu d'Europa baxa los tipos d'interés

La baxada de mediu puntu nos tipos d´interés por parte del Bancu Central Européu (BCE) ye la respuesta, cola que se contaba de va tiempu, a la mala traza que presenta anguaño la economía europea. L'últimu datu qu'emburrió al BCE a baxar el preciu de les perres foi l´anuncia de la entrada en recesión del motor económicu européu: Alemaña. .



Alemaña ye la tercer fuercia económica nel mundiu y la primer economía del Vieyu Continente. De fechu la mayor parte de la tecnoloxía, esportaciones y grandes empreses na Zona Euru falen n'alemán. Pero la situación macroeconómica del país nun ye precisamente p'alegrase, con quiebres empresariales a esgaya, paru record, cayida perimportante d'hasta 126.400 millones d´euros nos ingresos de les Alministraciones Publiques, déficit penriba´l 3,6% (lloñe del 3% marcáu pola Xunión Europea nel Pactu d´Estabilidá), y pa finar, cayida de dos décimes nel PIB alemán, colo qu'entama dafechu la recesión económica. Mentantu les autoridaes económiques comunitaries tan asustaes cola situación d´Alemaña y col efectu dominó que puede espardese pelos países europeos. La economía alemaña vien yá fallando dende´l 2001 cuando´l PIB tuvo una probetaya xuba d´un díxitu. El perimportante pesu económicu d´esti país foi decisivu pa que´l BCE recortare 0,5 puntos el tipu d´interés na Zona Euru p´asistiase agora nel 2%.

Dellos países europeos tienen riesgu de tamien entamar una recesión económica como Alemaña, casu de Gran Bretaña, que tuvo una xuba del PIB del primer trimestre d´esti añu del 0,2% y que sigue col asuntu de la posible entrada nel Euru. Holanda ye ún de los países europeos con peor traza xunta Alemaña: en recesión económica con cayíes del PIB del 0,2% y 0,3% nel cuartu trimestre del 2002 y primeru del 2003 respectivamente. Francia tien dellos problemes económicos que s'espeyen nuna cayida del PIB del 0,3% nel primer trimestre d´esti añu. Italia nun ta meyor, y la desaceleración económica baxó'l PIB tresalpín del primer trimestre un 0,1%. Pero la pantasma de la recesión nun s'asistia namás n'Europa sinon que les principales potencies como Estaos Xunios, Canadá y Xapón tan sofriendo abondo.

Énte esti panorama, el Bancu Central Européu (BCE) quier que la economía europea garre fuelgu al traviés d´una política de liquidez monetario. Pero la baxada de tipos d´interés nun ye bona pa toles clase. Por poner un casu, los aforros de los trabayadores nun dan réditu dengún nesti escenariu de tipos perbaxos. Otramiente, a miembros de la Zona Euru como l´Estáu Español nun-yos convién una política de tipos d´interés baxos pol problema estructural d´inflación que tienen. Pero los grandes manden y agora toca baxada de tipos.