El 87 por cientu de los internautes asturianos usen una rede social

La rede de blogues Ocio Networks ta acabante de publicar los datos d’una encuesta fecha ente internautes asturianos. Ésta señala que’l 87 por cientu usen una rede social. Facebook ye la más mayoritaria de toes.
 
El segundu ‘Estudiu d’Hábitos d’Internet’ fechu por esta empresa con sede en Madrid, señala que los usuarios de redes sociales n’Asturies –un 87 por cientu, 14 puntos más que l’añu pasáu– apuesten de forma principal por Facebook, al ser utilizada por un 67 por cientu de los internautes encuestaos. En segundu llugar, con un 35 por cientu d’usuarios, ta’l Tuenti, siguíu del Twitter, con un 22 por cientu. Estos datos confirmen la penetración grande que tan teniendo les redes sociales ente los internautes asturianos hasta convertise na so primer “ferramienta social”, en pallabres d’Alejandro Suárez, direutor executivu d’Ocio Networks y espertu en nueves tecnoloxíes.
 
L’impactu de les redes sociales inflúi tamién nel usu d’otros medios de comunicación. Asina, un 70 por cientu de los encuestaos reconoz qu’amenorgó’l so consumu de televisión, frente al 57 por cientu del 2009, y otru 50 por cientu afirma que llee menos prensa en papel, a diferencia del 43 por cientu del añu anterior. D’igual forma, munchos usuarios faen un usu menor del teléfonu móvil y utilicen pa comunicase la rede social. “Les redes sociales tán sustituyendo de forma progresiva a otros medios pa la comunicación direuta. Por exemplu, na pasada Navidá vimos como descendía’l númberu de mensaxes de testu y aumentaba la comunicación al traviés d’estes redes. Los internautes cada vez dediquen más tiempu a comunicase ente ellos", afirma Suárez.

Comparte...                                    

Enllaz permanente