El 82% de la mocedá asturiano nun pue tener llar propiu

|

La precariedá, temporalidá, subocupación y sobrecualificación de los trabayos tornen la posibilidá d'emancipase - Asturies cabezalera na probitú xuvenil

Según el sociólogu Joffre López, que presentó nel Conseyu de Mocedá de Xixón los datos del estudiu fechu pol Observatorio de la Emancipación del Consejo de Juventud de España cada mozu habría ingresar 1.660 euros al mes y destinar el 50 por cientu del  so salariu pa ser a mercar una vivienda, ye dicir un 70% más del salariu mediu anguaño.

Joffre tuvo acompañáu na presentación por Sheyla Suárez, presidenta del Conseyu de Mocedá d’Asturies, Javier Suárez Llana,  presidente del Conseyu de Mocedá de Xixón y Héctor Saz, presidente del Consejo de la Juventud de España.

Asturies ye asina la tercer comunidá con menor tasa d’emancipación del estáu, y lo que ye más esmolecedor, la que tuvo nel últimu añu la mayor reducción d’esti indicador: l’autonomía residencial amenorgó un 5’21% nel conxuntu del estáu nun añu, mientres que n’Asturies el descensu foi del 18’39%

Según Joffre, la situación de la mocedá asturiano resúmese na precariedá, temporalidá, subocupación y sobrecualificación de los trabayos, porque Asturies ye cabezalera na murnia estadística de tener los mozos con más trabayu temporal  y na del desfase ente formación académica y cualificación pal trabayu.  Asturies tamién ta un 4’2% na media estatal de probitú de la población  mozo, que ye d’un 37’2% nel nuestru país.

Asina, el 82% de la xente mozo nun pue tener un llar propiu nesti momentu, ye dicir namás el 18% de la mocedá d’Asturies pue acceder a una vivienda independiente.

Héctor Saz, pidió por ello a les fuercies polítiques midíes que faigan asequible la vivienda a la mocedá y Sheyla Suárez aporfió na necesidá d’entamar un plan de vuelta de los mozos y moces que tuvieron que colar d’Asturies y tornar l’éxodu de la mocedá asturiano, condicionáu pola falta de vivienda y trabayu.

Contador Estadistiques