Educación prevé un aumentu del 2,1 por cientu d'alumnos de llingua asturiana en Primaria y del 5,38 en Secundaria

La Conseyería d'Educación prevé que'l númberu
d'alumnos qu'estudien llingua asturiana nos centros públicos
d'enseñanza primaria y secundaria siga aumentando al mesmu ritmu de los
últimos cursos. Concretamente, les estimaciones del Gobiernu asturianu
pal cursu 2007-2008 son d'un 2,1 por cientu más d'estudiantes en
primaria, y un 5,38 por cientu en secundaria. Per otru llau, esti cursu va ser
el primeru de los últimos 26 nel que se rexistre un aumentu global del
númberu d'alumnos, sumando los matriculaos n'infantil, primaria,
secundaria y bachiller. D'esti mou va haber na escuela asturiana 105 alumnos
más que l'añu pasáu.

Estes son les estimaciones de la Conseyería, anque entá nun
hai datos oficiales de la matriculación n'asturanu nel presente cursu
yá que ta previsto que'l responsable d'Educación, José
Luis Iglesias Riopedre, faiga públicos los númberos definitivos
la próxima selmana de manera oficial. Demientres el cursu pasáu,
la cifra d'estudiantes de llingua asturiana n'educación primara foi de
16.019 sobre un total de 28.735. El cálculu aproximáu indica que
la cifra pueda aumentar sobre unos 350 alumnos. Nel casu de secundaria, el
númberu d'estudiantes d'asturianu demientres la temporada llectiva
2006-2007 foi de 4.393, sobre un total de 30.727.

El cálculu de los responsables de la Conseyería ye d'unos 250
alumnos más pal presente cursu. El porcentaxe d'alumnos d'asturianu, con
respecto al total d'estudiantes del pasáu cursu foi en primaria del 55,7
por cientu. En secundaria, la cifra baxó al 14,2 por cientu. Asimesmo ta
prevista tamién la incorporación d'unos cuatro profesores de
llingua asturiana tanto en primaria como en secundaria. Nel pasáu cursu
los enseñantes de la especialidá fueron 164 nel primer nivel
educativu y 68 nel segundu. El descensu del porcentaxe d'estudiantes de llingua
en secundaria débese principalmente a qu'en primaria la llingua compite
únicamente con cultura asturiana, mientres que nel segundu nivel
inclúyese nun paquete de delles optatives, ente les que tan
francés o cultura clásica.