Echa andar la escuela de música tradicional n'Ayande

El Conceyu de la Puela d'Ayande apuesta pol enseñu de la música tradicional asturiana, pa ello entama la so escuela de música tradicional municipal.

La escuela de música tradicional d'Ayande, como suel ocurrir, nun sal de la nada. Va tiempu qu'ellí había clases de gaita y tambor, ye dicir, el conceyu yá tenía un ambiente al rodiu de la música asturiana que demandaba la so oficialización al traviés d'una escuela municipal. Esa escuela arranca agora coles asignatures de Gaita, curdión, percusiones tradicionales, baille, llinguaxe musical y una asignatura especial llamada Música y Movimientu pa los neños y neñes más pequeños. Los profesores van ser el gaiteru de "Felpeyu" Diego Pangua, el percusionista y curdionista Marcos Rodríguez, Maribel Parrado y Belinda Álvarez , que van poner clas nos locales de la escuela pública de la Puela.