Easyjet yá espubliza los horarios de vuelos dende Ranón

Asturies yá apaez nel mapa européu de los vuelos baratos. La conexón de Ranón col aeropuertu de Londres Stansted y que va echar a andar el próximu 20 d'abril yá apaez na web de la compañía de "vuelos baratos" dende la que l'internauta yá pue componer bien de viaxes a distintos aeropuertos europeos.

Como adelantáremos n'Asturies.com, va ser l'aeropuertu de Londres-Stansted onde se posen los aviones d'Easyjet que salgan dende Ranón, una llinia diaria que va salir del aeropuertu asturianu a les 15:20h pa llegar a Stansted una hora dempués, alteriándose l'horariu los fines de selmana. L'anuncia vien acompañada tamién d'otra bona noticia, y ye que la llinia va entrar en serviciu'l 24 de marzu, un mes enantes de la fecha que s'anunciare de mano, el 20 d'abril.

L'aeropuertu inglés de Stansted ta asitiáu a mediu camín ente Londres y la villa universitaria de Cambridge, y el viaxeru asturianu pue dir hasta allá con un billete que va costá-y unos 12,49 euros por términu mediu (tases aparte), anque los primeros en querer montar nel avión blancu y naranxa'l prósimu día 24 de marzu van tener que pagar la primada y poner 20,49 euros nel viaxe inaugural. Volver a Asturies dende l'aeropuertu inglés ye un poco más caro, y la ufierta promocional pal billete de vuelta ta en 19 euros. Esti preciu nel billete d'ida a 12,49 euros va caltenese hasta'l 28 d'abril, momentu en que'l preciu del billete va alterase acordies a lo qu'estime oportuno la compañía. El billete de vuelta va movese nesti tiempu ente los 12,49 y los 20,49 euros

Lo más interesante entama en llegando a Stansted, y ye qu'amás de poder allegase hasta Londres en pocos minutos, l'aeropuertu inglés ye una rampla de lanzamientu que-y pon al viaxeru prácticamente Europa entero a tiru de bien poques perres

Por poner dellos destinos y precios, n'Asturies.com garramos el día 24, día en qu'entama'l serviciu de la llinia y nel que tamién entama la ponte de selmana santa, lo que fai d'el un día potencialmente malu en cuantes a les ufiertes y precios que podamos garrar. El viaxeru asturianu que llegue a les 4:20 a Stansted pue xubir hasta Glasgow (Escocia) por 48 euros nun vuelu que-y sal a les 6. A la mesma hora pue salir pa Belfast (Irlanda) por 113 euros, un preciu y una hora que se valen tamién pa salir en dirección a Copenhague (Dinamarca). Les canales d'Amsterdam pónense a tiru de 84,20 euros. Más caro ye dir hasta Munich, que se pon en 171 euros, un preciu que val tamién pa dir a Praga.

Claro que quien tenga tiempu y pueda esperar a que pase l'afoguin de la selmana santa va alcontrar precios muncho más económicos: el martes 29 de marzu, la conexón con Glasgow ponse en 18,80 euros, la de Belfast pega un baxón más espectacular y ponse en 40,60. Copenhague baxa a 55,20 euros y Amsterdam a 33,41 mientres que Munich queda en 69,73 y Praga en 55,20.

Evidentemente, esto ye emplegando los horarios y servicios d'Easyjet. Stansted ye una rampla de llanzamientu a toa Europa dende la qu'operen otres compañíes a baxu coste, ente elles Berlin Air o Ryanair, la mayor competidora d'Easyjet, una llinia que pue llevar esi mesmu día 24 de marzu al viaxeru a munchos destinos como Roma por 101,40 euros, Berlín por 144 o Oslo por 43,57 euros, ello amás de competir munches vegaes con Easyjet en precios nos mesmos destinos.

Más información nes webs de Easyjet, Ryanair y del Aeropuertu de Stansted