Dos propuestes musicales norteamericanes protagonicen l'axenda del fin de selmana

La música vuelve ser la protagonista de l'axenda d'ociu pa esti fin de
selmana nel nuesu país. En concreto, dos propuestes musicales de mas
p'allá del atlánticu. D'esti mou'l sábadu tenemos nel
Centru Cultural Caxastur de Mieres a les 20:00 l'actuación de
"Les Batinses", grupu que
se convertió nos últimos años nún de los
máximos esponentes del bayorosu panorama musical de
Québec.
Ellos son los responsables d'una de les propuestes más orixinales y
revitalizadores qu'asocedió nel folk "quebecoise"
contemporáneu, y la so música, qu'ellos mesmos califiquen de
"neo-folk internacional", algama la fuerza de les balaes
tradicionales, de los "reels" y les polques a l'antigua, pero amestándo-y
elementos propios del rock, funk, jazz, ska, hip-hop, salsa rumba, ritmos
balcánicos o mesmamnte cantos a "capella".

Tamién provinientes de tierres norteamericanes, van actuar esti
domingu na sala Nuevo Savoy de Xixón a les 22:00"The Tennessee Three",
banda mítica del músicu norteamericanu
Johnny Cash. Y ello ye que dende'l so
llanzamientu como artista hasta los sos últimos díes nel
escenariu, Johnny Cash escoyó trabayar esclusivamente con una sola banda
y contar con ellos pa da-y esi soníu único que sedría
reconocíu por millones de fans en tol mundu como "El soníu
de Johnny Cash". Bob Wootton fixo toda una institución de la
guitarra "boom-chicka-boom" que caracteriza la mayoría de les
canciones d'elli, mientres que W.S Holland tien el so espaciu acutao na
historia de la música como'l primer batería de Rock and Roll. La
música de "The Tennessee Three" foi igual d'importante nel
soníu y éxitu de Johnny Cash como la so propia voz. Mas
actividaes pa esti fin de selmana na nuesa
axenda d'ociu.