Dos manifestaciones centren les reivindicaciones del 1 de mayu

La xornada del 1 de mayu, día del trabayu, va celebrase como yá ye vezu n'Asturies con dos convocatories estremaes. Los sindicatos mayoritarios CCOO y UXT convoquen per una parte a una manifestación n'Uviéu a les 12 del mediudía na Plaza d'América, mientres que CSI y CXT, xunta'l sindicatu d'enseñanza SUATEA convoquen a otra marcha en Xixón a la mesma hora saliendo dende la Plaza l'Umedal.

Nel casu de les centrales mayoritaries, el lema de la marcha va centrase en pidir un mayor apueste pola industria, como pegoyu fundamental del desarrollu y crecimientu de la economía asturiana, anque otra reivindicación d¡ámbitu non llaboral tamién va tar presente na manifestación, que va sofitar el procesu de paz nel País Vascu.

Otramiente, CSI, CXT y SUATEA enfoquen la so convocatoria a facer una llectura crítica de la reforma del mercáu llaboral qu'aseguren que tan amagostando ente gobiernu y sindicatos mayoritarios y que dicen va llevar a más abaratamientos del despidu y facilidaes pal pieslle d'empreses. Los socesos de Francia, onde les movilizaciones populares entornaron la reforma llaboral son l'espeyu en que se mira una manifestación que quier ser crítica cola emigración de la mocedá asturiana, la política urbanística y la falta de derechos civiles de los inmigrantes.