Dos cargos nuevos pal executivu

Del conseyu de Gobiernu d'ayeri salieron dos nombramientos más colos que va pesllando l'organigrama del executivu asturianu pa esta llexislatura. D'una parte l'Ente de Residencies p'Ancianos (ERA) va quedar al cargu de Ángel González Alvarez, conceyal del Ayuntamientu de Llaviana dende 1980 y actual coordinador d'IX de Llaviana.

D'otra parte aprebóse tamién el nombramientu de Fernando Menéndez Rexach como nuevu Director Xeneral de Tresportes y Puertos, cargu d'especial relevancia que vien a ocupar ún de los "fichaxes estrella" del executivu. Menéndez Rexach, que sustituye a Emilio Miralles, vien col encargu d'echar a andar el consorciu de tresportes del Principáu, ún de los proyectos más ambiciosos del gabinete Areces na llexislatura anterior pero que nun pudo salir alantre y qu'acabó costándo-y el cargu a Javier del Olmo, daquella otru de los fichaxes gordos del executivu

Inxenieru de Caminos, Canales y Puertos, Rexach presenta un currículum con 29 años d'esperiencia nel sector del tresporte, teniendo trebayao nel Ministeriu del Equipamientu francés y ocupao'l cargu de Director del Plan Xeneral de Carreteres 1984-1991 nel estintu MOPU. La esperiencia más de recién nel sector públicu de Rexach foi na Comunidá de Madrid, onde ocupó un cargu equivalente al que va tener agora n'Asturies. Nel sector priváu, Menéndez Rexach ye ún de los socios fundadores de SPIM, consultoría especializada en tresporte y loxística creada en 1994 que ye la filial española del grupu holandés DHV.

Con estos dos cargos, yá namás falta na estructura del executivu poner un delegáu énte la UE, cargu que-y propunxeron al anterior conseyeru d'agricultura Santiago Menéndez de Luarca