Discursos estremaos nel primeru de mayu

Les dos grandes manifestaciones que se desarrollaron ayeri n'Asturies con motivu del Día del Trabayu espeyaron dos visiones distintes de la situación social y llaboral asturiana

D'una parte, la manifestación uvieina de los sindicatos mayoritarios, qu'axuntó a 20.000 persones según los sindicatos y 3.000 acordies cola policía, centróse nel apueste pola industria, defendiendo "un cambéu de modelu productivu" al traviés de la diversificación y la defensa de nueves midíes de creación d'emplegu. El discursu de CCOO y UXT incluyó'l fenómenu de la emigración de la mocedá asturiana como ún de los problemes más graves qu'enfrenta Asturies y pidió tamién que s'ataye l'alta siniestralidá llaboral al traviés del Plan de Salú Llaboral, amenazando'l dirixente de CCOO Antonio Pino con movilizar el so sindicatu si esti plan nun echa a andar.


Otramiente, los sindicatos minoritarios CSI, CXT y SUATEA desarrollaron en Xixón una manifestación na que participaron cerca de 2.000 persones y que se centró, no llaboral, nuna llectura crítica de la reforma del mercáu llaboral qu'aseguren que tan amagostando ente gobiernu y sindicatos mayoritarios y que dicen va llevar a más abaratamientos del despidu y facilidaes pal pieslle d'empreses, amás d'esixir que s'acabe cola emigración de la mocedá asturiana y denunciar la privatización de l'alministración pública y del sistema educativu. Na marcha participaron tamién colectivos como los d'inmigrantes, qu'aportaron otros discursos a la marcha, como foi'l casu del de refuxaos colombianos n'Asturies, que denunciaron el que les fábriques asturianes d'armamentu tean vendiendo pieces que s'empleguen nos conflictos colombianos al empar que desarrollen un tanque pal exércitu israelín. Na marcha, na que se vieron pancartes al favor del reconocimientu del asturianu, participaron tamién los partíos nacionalistes asturianos Andecha Astur y Izquierda Asturiana.