Dimiten trés miembros de la presidencia d'Izquierda Xunida

|

Marisa Rodríguez Jareño, Javier Martínez Andrade y Telly Lorenzo dexen la presidencia d'Izquierda Xunida (IX), anque siguen nel Conseyu Políticu. La razón ye discrepancies cola xestión actual.

"Nun queremos ser cómplices d'una xestión que ta dañando a la nuesa organización", apunten nun comunicáu estres trés persones pertenecientes a la estaya 'Faciendo. Construyendo dende les bases'. En concreto, señalen la falta d'alderiques "tranquilos y profundos nel Conseyu Políticu, muéganu máximu de direición", y el desaniciu de les víes de participación al serviciu de militantes y simpatizantes, lo que, na so opinión, impide un averamientu de la sociedá  a IX. "Esta ye una decisión meditada, depués de dar avisos del nuesu desalacuerdu –dimisiones de conceyalíes, de secretaría, de coordinación d'árees, na Comisión de Garantíaes...– y trescurrir el tiempu suficiente, mientres el qu'observamos que nun hai intención nenguna de cambiu", apunten, pa depués añadir que con esti movimientu "confiamos en favorecer la renovación de los cargos na presidencia que lleven dellos meses ensin ocupase".

Por último, apunten que van continuar nel Conseyu Políticu "pa siguir trabayando, dientro de la organización, por too esto que defendemos". Rodríguez Jareño trátase de la coordinador actual d'IX en Corvera, mentes que Lorenzo ocupó'l cargu de secretaria de de Movimientos Sociales hasta hai un añu, cuando presentó la so dimisión. Pela so parte, Martínez Andrade ye integrante de la direición llocal d'Uviéu.

 

 

Contador Estadistiques