Diez persones con mancadures y una detenida al echar la Policía a un grupu de trabayadores trancaos nel Hospital Central

La Policía cargó ayeri contra un grupu de trabayadores que participaben nun encierru convocáu polos sindicatos d'Auxiliares d'Enfermería (SAE) y de celadores (Sicepa) nel Hospital Central d'Asturies. Na carga resultaron con mancadures diez persones y la policía detuvo a ún de los trabayadores participantes nel encierru. L'encierru de los trabayadores tenía por oxetivu la reclamación d'una carrera profesional pa los colectivos d'auxiliares d'enfermería y celadores asemeyada a la que l'alministración autonómica yá pautó colos colectivos de médicos y enfermeros.

El portavoz del sindicatu Sicepa, Francisco Menéndez Fernández, participante nel encierru, aseguró que la policía cargó dos vegaes contra los encerraos de manera "brutal" y ensin avisu previu hacia les 11 de la mañana dando colos toletes a los encerraos, cuando l'actitú de los sindicalistes fuere en tou momentu pacífica. Los diez trabayadores mancaos acudieron colos sos partes médicos a comisaría pa presentar denuncia polos fechos. No tocante a la persona detenida, fontes sindicales esplicaron que se trataba d'un trabayador que, por motivos profesionales, llevaba un cutter" qu'usaba p'abrir caxes y paquetes y al que la policía acusó de "atentáu" según los portavoces de SICEPA.

La Federacion de sanidá y sectores sociosanitarios d'Asturies de CC.OO. emitió un comunicáu de protesta pola actuacion policial y solidarizándose colos trabayadores. CC.OO. esixe tamién la "dimision que correspuenda de los responsables d'esta descomanada actuación policial".