Díaz Aguado espunxo en Breizh les polítiques asturianes en transición ecolóxica y enerxética

La direutora xeneral d’Enerxía, Minería y Reactivación tamién faló nel I Foru Celta celebráu en Rennes de cómo afronta Asturies la descarbonización de la economía.

L'alcuentru de les naciones celtes impulsáu por Rannvro Breizh, el conseyu rexonal bretón, aconceyó a siete territorios: Breizh, Alba, Éire, Cymru, Galicia, Asturies y Kernow. Una cita na que tanto Asturies como Galicia acudieron con una representación de segundu nivel, al desplazar a Francia a dos direutores xenerales, nel casu gallegu'l de Relacións Exteriores e coa Unión Europea, Jesús María Gamallo, mentes que'l restu de países optó por altos cargos o pol embaxador, como foi'l casu d'Irlanda.

El perfil concretu de María Belarmina Díaz Aguado llevó a l'asturiana a falar nel Foru Celta de les estratexes y polítiques impulsaes pol Gobiernu nel ámbitu de la transición ecolóxica y enerxética y cómo ta afrontándose dende Asturies la descarbonización de la economía. "La necesidá d'estender les enerxíes renovables nestos territorios daes les posibilidaes de toos ellos, sobre manera les rellacionaes coles enerxíes eólques marines como elementu tractor de les actividaes portuaries y de la cadena de valor industrial, garantizando la coesistencia colos aprovechamientos actuales de les agües marines" foi ún de los importantes temes a tratar na población bretona.

Llueu del Foru Celta los siete países firmaron la 'Declaración de Rennes', un alcuerdu pa la cooperación intercéltica en cuestiones como la educación, les enerxíes renovables, la promoción del patrimoniu, los idiomes o la innovación.

Na semeya, un momentu de la intervenció de Díaz Aguado.