Detienen n'Uviéu a un sospechosu de los atentaos del 11-M

Una selmana dempués de los atentaos del 11-M, la llista de deteníos en rellación cola autoría de los mesmos yá llega a les nueve persones. Xunta los cinco deteníos del sábadu pela tarde, hai qu'amestar güei otres cuatro persones deteníes d'orixe magrebín, que van pasar agora a disposición de l'Audiencia Nacional. Trés d'elles apaecieron n'Alcalá de Henares, mientres que les primeres anuncies dicíen que la cuarta persona detuviérenla nuna "ciudá del norte". La Cadena SER adelantó pel mañana qu'esa ciudá del norte nun ye otra que Xixón, pero'l ministeriu del Interior esclarió pela tarde que la detención fuere n'Uviéu y non na Villa de Xovellanos. Interior esclarió qu'esta tarde hebo una quinta detención d'otra persona de Marruecos en Madrid

La radio dixo tamién que'l ciudadanu marroquín deteníu n'Uviéu podría ser ún de los terroristes qu'escaparon trés del atentáu integrista en Casablanca (Marruecos) que mató a 41 persones el 17 de mayu del 2.003

D'otra manera, el xuez de l'Audiencia Nacional Juan del Olmo entamó güei a toma-yos declaración a los cinco deteníos del sábadu, los ciudadanos marroquinos Jamal Zougam, Mohamed Chaoui y Mohamed Bekkali, y los indios Suresh Kumar y Vinay Kholy. El procesu de toma de declaración pue llevar tola tarde.