“Desmontemos la mentira: el problema nun ye l’asturianu, sinón la ultraderecha”, afirma Rafael Palacios

“Nun ye aceptable porque castiga y discrimina a la xente qu’emplegamos con normalidá les llingües propies d’Asturies na Xunta Xeneral”, critica Rafael Palacios. El diputáu de Podemos acusa a la FSA de “baillar l’agua a VOX” cola so propuesta y afirma que “el problema nun ye l’asturianu, sinón la ultraderecha”.

El de Ciañu insiste en que “nun esiste conflictu nengún. Ye VOX el que ta buscando’l so crecimientu en xenerar conflictu y odiu. Na sociedá asturiana y na Xunta Xeneral l’asturianu nun supón un problema”.

“Al treslladar la obligación de traducir al que fala tas castigándolu, desincentivando l’usu del idioma y afitando la so discriminación”, sigue Palacios, qu’avanza que, nel casu de que la propuesta de la FSA garre forma y tenga l’apoyu d’otros grupos, “yo voi siguir falando n’asturianu y gallego-asturiano y nun voi autotraducime. Que tengan el valor de pidir traducción simultánea si quieren siguir col esperpentu: ‘Bonos díes. Buenos días”.

El diputáu de Podemos recuerda que tanto l’asturianu como’l castellanu “son intercomprensibles” y que la situación que se ta plantegando ye “una cuestión inédita nel restu de parllamentos del Estáu”. “Desmontemos la mentira: el problema nun ye l’asturianu, sinón la ultraderecha”, afirma al tiempu qu’acusa a la FSA de “baillar l’agua a VOX” cola propuesta presentada na Xunta de Voceros qu’obligaría a la traducción de la intervención pol propiu diputáu nel casu de qu’otru diga nun entendelu, quedando rexistrada nel diariu de sesiones namái la que sía en llingua castellana.

Dada la situación esixe “a los responsables de Política Llingüística que se posicionen con claridá. Nun ye aceptable la propuesta porque castiga y discrimina a la xente qu’emplegamos con normalidá les llingües propies d’Asturies na Xunta Xeneral. Nun se pue permitir esti despreciu. Pido amparu a los nuesos responsables políticos, que defendan los mios derechos, porque ye un retrocesu democráticu pergrave".

Por último, reclama a los socialistes y al restu de formaciones que presenten les sos propuestes “per escrito” y afita que Podemos “nun se va mover nin un milímetru” de la posición que vien defendiendo.

Semeya (recortada) obra d'Iván G. Fernández.