Derrota del Farho Xixón Baloncestu en Cáceres

El Farho Xixón Baloncestu salió derrotáu de la pista del Cáceres 2016 C. B. nun partíu mui igualáu que se decidió nel últimu cuartu, anque l'equipu asturianu nun ganara nengún de los cuartos del alcuentru. L´equipu xixonés mantien la octava plaza na clasificación, anque agora tien a una victoria a los equipos de Los Barrios C. B. y del Plasencia Galco. Pa esti alcuentru’l Farho Xixón tuvo de nuevo la baxa del so capitán Antxon Iturbe, que ye posible qu´entá nun puea xugar escontra`l León Baloncesto Caja España`l vienres.


El partíu entamó perbien pal equipu xixonés, con un resultáu de 4-12 nos primeros minutos, pero'l xoven xugador local, Antelo, echóse l'equipu al llombu y dempués d'un parcial de 14-2 pa los estremeños, punxo un marcador de 18-14.
Nel segundu cuartu destacó nel Farho Xixón Baloncestu Jorge Lledó con un gran trabayu na defensa, anque'l Cáceres 2016 C. B. llegara al descansu con una ventaya de 4 puntos, 39-35.


El xuegu interior de los estremeños nel tercer cuartu fizo qu´algamaren una diferencia de más de diez puntos, 53-42. Nel caberu cuartu Young foi`l que dio la cara nel equipu xixonés, pero la defensa local llevólos al trunfu por una diferencia de 11 puntos.


Destacaron nel Cáceres 2016 C. B. Josh Asselin (24 puntos, 7 rebotes y 3 mates), Fernando Vicario (18 puntos), Dani López (13 puntos y 4 asistencies), Blackshear (11 puntos y 6 rebotes). Y Ramón Moya (9 puntos, 6 rebotes y 2 asistencies). Nel Farho Xixón Baloncestu´l másimu anotador foi Keith Waleskowski (17 puntos, 6 rebotes), Xavi Vallmajó (16 puntos) y Jorge Lledó (7 puntos y 10 rebotes).


Alliniaciones:


Cáceres 2016 C. B.: Dani López (13), Fernando Vicario (18), Devon Blackshear (11), Ramón Moya (9) y Josh Asselin (24). Tamién xugaron: Miguel Morales, Carlos Vaquero, David Patron, Iván Humanes (4) y José Ángel Antelo (8).


Farho Xixón Baloncestu: Xavi Vallmajó (16), Chus Poves (13), Saúl Blanco (8), Keith Waleskowski (17) y Tim Young (11). Tamién xugaron: Josep Ortega (4), Josep Pacreu, Rubén Suáez y Dani González.


Árbitrios: Germán Morales y Mariano Martín Palomo. Eliminaos por cinco faltes personales nel Farho Xixón Baloncestu Xavi Vallmajó y nel Cáceres 2016 C. B. Devon Blackshear y Dani López. Partíu xugáu nel Pabellón Multiusos Ciudad de Cáceres.
Parciales per cuartos: 23-20, 16-15, 20-19 y 28-22.