Dende ayeri, Ayer ye Ayer

El conceyu ayerán decidió nel so plenu d'ayeri adoptar la denominación billingüe Aller / Ayer pal so nome oficial col votu al favor de los conceyales de PSOE y IX-BA y col votu en contra de los del PP.

La denominación oficial doble pal conceyu amiéstase a la recuperación de tola so toponimia tradicional, un llabor que, anque pendiente del preste del Conseyu de Gobiernu, yá s'aprobó en plenu del conceyu ayerán va cerca de dos meses. L'espediente de topónimos ayeranos ye de los más echaos p'alantre na recuperación d'estes formes tradicionales pa los sos nomes de llugar, y ye que namás los topónimos de Moreda- Morea y Cabanaquinta - Cabañaquinta van caltener les formes billingües xunto cola doble denominación de "La Polavieya" y "La Pola del Pino" por pitición de los vecinos.

Lo que nun podía camudase nel espediente toponímicu que se-y unvió a Conseyu de Gobiernu yera la denominación oficial del Conceyu, que siguía siendo "Aller", y ello ye que, anque'l Gobiernu asturianu tien la capacidá llegal d'oficializar los topónimos tradicionales, los nomes oficiales de conceyos precisen d'andar per otru camín llegal pa que se-yos reconoza la denominación tradicional. Según esplicó a Asturies.com el conceyal de cultura ayerán Santos Fanjul, pa que se reconociere como única forma posible l'asturiana "Ayer" l'asturianu tendría de ser llingua oficial acordies col separtáu 2 del artículu 14 de la Llei de Réxime local, pero ello ye que'l Conceyu alcontró que la Llei de Bases del Réxime Local sí permitía amestar la forma tradicional al nome del conceyu al traviés d'un alcuerdu por mayoría absoluta del plenu del conceyu. Esto foi lo que se llogró ayeri col únicu votu en contra de los conceyales del PP ayerán, que tuvieron especialmente roceanos con tol procesu de recuperación de la toponimia ayerana dende l'entamu del mesmu.

Col pasu que s'aprobó ayeri, el conceyu d'Ayer va mandase a toles instituciones oficiales del Estáu español pa que se-y reconoza esta doble denominación, dende Estadística hasta Cartografía, pero sigue ensin tener resuelta la papeleta del reconocimientu del so espediente toponímicu dientro d'Asturies. Santos Fanjul aseguró a Asturies.com desconocer la causa del retrasu que lleva l'espediente toponímicu ayerán, presentáu yá a Conseyu de Gobiernu nel mes de xineru, y dixo nun tener conocimientu de cuando podría aprobase.

Sicasí, Ayer sigue avanzando na normalización de la so toponimia, y Santos Fanjul comentó nesti sentíu que'l personal del conceyu sigue asitiando rótulos y carteles nuevos colos topónimos tradicionales a un ritmu normal. Hai que llamentar nesti sentíu los actos vandálicos contra estos carteles, qu'apecieron bien d'ellos entafarraos con pintura o colos nomes na so forma acastellanada escrita con xirón de pintura enriba de la tradicional asturiana. El responsable de cultura ayerán declaró que, anque entovía nun se pudo prindar a nengún responsable por ello, existen sospeches sobre quien foi o foron los que tan tres d'estos actos.