Dellos conceyos voten esti xueves mociones d’apoyu a la querella arxentina contra’l franquismu

La iniciativa d’un grupu de ciudadanos va llevar esti xueves al Plenu de dellos conceyos mociones d’apoyu a la querella arxentina contra’l franquismu. Nel 2010, una xuez abrió una investigación tres una denuncia de familiares de víctimes.

Esta querella recibió dende un principio munchos apoyos a esti llau del charcu pola situación de desamparu que sienten los familiares de los asesinaos mientres la dicturadora, sobre manera dende l’aprobación nel 1977 d’una Llei d’Amnistía que dexó impunes a los responsables d’estos crímenes. Dende va trés meses, un grupu de ciudadanes y ciudadanos asturianos decidieron entamar una plataforma d’apoyu a la querella arxentina contra’l franquismu “por delitos de xenocidiu y lesa humanidá”, pasando a formar parte de la Rede Aqua. El so primer oxetivu ye, siguiendo los pasos de la Plataforma Vasca pa la Querella contra los Crímenes Franquistes, promover l’aprobación de declaraciones institucionales nel Parllamentu y nos conceyos, una llinia de trabayu que mañana verá los sos primeros frutos. N’Euskadi, l’Eusko Legebiltzarra y municipios como Donosti, Gasteiz, Gernika, Irun y Eibar yá apoyaron la iniciativa.

Mieres, Ayer y Ḷḷena son dalgunos de los conceyos asturianos que mañana van votar estes mociones tres les conversaciones entamaes pol Grupu Asturianu d'Apoyu a la Querella Arxentina coles direiciones de la FSA-PSOE y Izquierda Xunida (IX). “Vamos siguir recoyendo l'apoyu de les nuestres instituciones a la querella y tamién el de tola ciudadanía cola recoyida de firmes d'adhesión”, señalen dende la plataforma, que yá trabaya en llevar l’apoyu a la querella a la Xunta Xeneral. Nesi sen, anuncien que la proposición non de llei que'l grupu parllamentariu d'IX rexistró va poco nel Parllamentu acompañáu de dalgunes asociaciones nun partíó del coleutivu ciudadanu. Por último, llamen a toles organizaciones interesaes en trabayar nesti proyeutu a sumase a la causa col oxetivu d’axuntar fuercies.

Na imaxe, Francisco Franco nuna visita a Eibar nel 1949. Semeya obra d'Indalecio Ojanguren donada al Gipuzkoako Foru Aldundia.